Batys Qazaqstanda qyzylshamen mektep oqýshylary da aýyryp jatyr
BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda málim etkenindeı, oblysta qyzylsha derekteriniń kóbeıýi baıqalady. Sońǵy úsh-tórt jyldy alǵanda, 2019 jyly 122 derek tirkelgen bolatyn.
Onyń sózine qaraǵanda, aýrý kóbine qyzylshaǵa qarsy ekpe almaǵan balalar arasynda kezdesip otyr. Munyń sebebi – ata-analardyń vaktsınadan bas tartýy, densaýlyǵyna baılanysty medıtsınalyq qarsy kórsetkishterdiń bolýy jáne balanyń egý jasyna jetpegeni (bir jasqa deıingiler).
Qyzylshamen aýyrǵandardyń 43,6 paıyzy – uıymdastyrylǵan toptaǵylar, 4,2 paıyzy – mektepke deıingi uıymdaǵy búldirshinder, 16,9 paıyzy – mektep oqýshylary, 1,4 paıyzy – stýdentter, 33,8 paıyzy – basqa da top ókilderi.
Aýyrǵandardyń basym bólimi nemese 69,4 paıyzy – Oral qalasynyń turǵyndary.
«Jańa oqý jyly bastalǵannan beri oblystaǵy tórt mektepte 7 oqýshy qyzylshaǵa shaldyqty. Sonyń ishinde Oral qalasynda 3, Syrym aýdanynda 1 mektepte tirkeldi. Qyzylshaǵa shaldyqqandardyń 43 paıyzy aýrýdy otbasy múshelerinen juqtyrǵan, ıaǵnı qyzylshaǵa qarsy ekpe alýdan bas tartqan jáne dertti juqtyrǵannan keıin epıdemıologııalyq kórsetkishter boıynsha shuǵyl vaktsınatsııadan bas tartqan adamdar. Naýqastarmen qarym-qatynasta bolǵan 645 adam anyqtalyp, medıtsınalyq baqylaýǵa alyndy, epıdemıologııalyq kórsetkishter boıynsha qarym-qatynasta bolǵandarǵa qyzylshaǵa qarsy shuǵyl ekpe jasaldy. Qyzylsha aýrýy aýyr túrde ótýi múmkin. Bul pnevmonııa, otıt, entsefalıt, menıngoentsefalıtke ulasyp, medıtsınalyq kómekke kesh júgingen kezde ólimge de soqtyrýy yqtımal. Qyzylshadan tek ekpe alý arqyly ǵana qorǵanýǵa bolatynyn turǵyndardyń esine salamyz. Qyzylshaǵa qarsy vaktsına Ulttyq ımmýndaý kúntizbesine engizilgen. Balalarǵa qyzylshaǵa qarsy egý 1 jasta, al revaktsınatsııa 6 jasta júrgiziledi. Ekpeden keıin ınfektsııadan qorǵaıtyn ımmýnıtet paıda bolady», - dedi M.Aryspaev.