BQO-da kıik etin óńdeıtin zaýyt salý úshin ınvestorlar qarastyrylýda

<p>Batys Qazaqstan oblysynyń ákimi Narıman Tóreǵalıev óńirdegi kıik sanyn retteý jumystary týraly pikir bildirdi. Oblysta 10 myńnan astam kıik aýlandy, 17 brıgada men 8 et kombınaty jumys istep jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Bıylǵy jyldyń qorytyndysy boıynsha bizde kıik sany 1 mln 300 myńǵa jetti. Ǵalymdardyń paıymdaýynsha, bir kıikke bir jylǵa 15 gektar jer kerek eken. Sonda 1 mıllıon kıikke 15 mıllıon gektar jer kerek degen sóz. Bizde bir mıllıonǵa jýyq iri qara mal bar. 2 mıllıonǵa jaqyn qoı men eshki bar, 350 myńnyń ústinde jylqy bar. Onyń bárine jem-shóp kerek», - dedi N. Tóreǵalıev elordada Ortalyq kommýnıkatsııalar qyzmetindegi baspasóz máslıhatynda.

Ákimniń aıtýynsha, Ekologııa jáne Aýyl sharýashylyǵy mınıstrlikteri kıik sanyn retteýge qatysty normatıvtik quqyqtar men aktiler qabyldady, Ohotzooprom operator bolyp taǵaıyndalǵan.

«Búginde biz 10 myńnyń ústinde kıik aýladyq, 17 brıgada jumys istep jatyr. Onyń ishinde 15 brıgada atý ádisimen, eki brıgada tormen aýlaıdy. Ohotzooprom 12 myńǵa jýyq múıizdi kesip alyp, akt jasap, nómirlep, árbir kıiktiń múıizin sanap aldy jáne arnaıy saqtaýǵa qoıylady. Sebebi kıiktiń múıizin satýǵa ruqsat joq. Kıik etterimen bizdiń oblysta 8 et kombınaty aınalysýda, onyń beseýi bizdiń oblystan jáne Aqtóbe men Atyraý kombınattary bar. Osy kombınattarǵa ár kelisine 315 teńgeden kıik eti jetkiziledi. Qalǵanyn ári qaraı et kombınattary 1200 teńgeniń aınalasynda satyp jatyr», - dedi BQO ákimi.

Sonymen birge, ákimge «Kıik eti shyqqan soń mal etine suranys azaıa ma?» degen suraq qoıyldy.

«Kıiktiń etin kez kelgen adam almaıdy, ásirese jastardyń kóbi bilmeıdi. Burynǵy Keńes úkimeti kezinde kıik etin jegen adam bolmasa, kópshiligi bilmeıdi. Sondyqtan asa qyzyǵýshylyq pen suranys bar dep aıta almaımyn. Qazir kıik etine qatysty ınvestorlar da kelip jatyr, et kombınatyn salýǵa qyzyǵýyshlyq tanytýda», - dedi Narıman Tóreǵalıev.