Batys Qazaqstanda gazben qosa benzın tapshylyǵy týyndady

<p>ORAL. KAZINFORM &ndash; Batys Qazaqstan oblysynda gazben qosa benzınniń jetispeýi baıqalyp otyr.</p>

BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Beıimbet Mýsınniń Kazinform tilshisine málim etkenindeı, óńirde 131 janar-jaǵar maı quıý stansasy bolsa, sonyń 26-synda nemese 20 paıyzynda AI-92 benzıni joq.

Onyń sózine qaraǵanda, saqtaý qoımalarynda 3 638 tonna AI-92, 500 tonna AI-95 jáne 10 672 tonna dızeldi otyn bar. 

Benzın tapshylyǵy Atyraý munaı óńdeý zaýytynyń 1 qazannan 25-ine deıin josparly jóndeý jumystaryna jabylýyna baılanysty. 

«Jospar boıynsha osy aıdyń 20-syna taman Atyraý munaı óńdeý zaýyty qosylýy múmkin. Sonda jaǵdaı retteledi dep oılaımyz», - dedi B.Mýsın.

Oral qalasynda keıbir janar-jaǵar maı quıý stansalarynda AI-92 benzıniniń joq ekendigin júrgizýshiler de rastady.

«Búgin «Berkýt» janar-jaǵar maı quıý stansalaryna baryp edim. AI-92 benzıni bolmady. Qymbattaý tússe de, AI-95 benzınin quıdyrdym», - dedi qala turǵyny Nurjan Ihsanov. 

Eske sala keteıik, budan buryn Batys Qazaqstan oblysynda suıytylǵan gaz tapshylyǵy týyndaǵanyn jazǵan bolatynbyz.

Keıingi kúnderi Oral qalasynda avtogaz quıý stansalarynda uzyna-shubaq kezek qalyptasqan.