Batys Qazaqstanda gaz quıý stansalarynda kezek áli kóp

<p>ORAL. KAZINFORM - Batys Qazaqstan oblysynda suıytylǵan munaı gazynyń tapshylyǵyna baılanysty avtogaz quıý stansalarynda uzynsonar kezek tyıylar emes.</p>

Júrgizýshilerdiń aıtýynsha, Oralda kólikterine gaz quıdyrý úshin saǵattap turýǵa týra keledi.

BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Beıimbet Mýsınniń Kazinform tilshisine málim etkenindeı, oblysqa "Jaıyqmunaı" JShS-dan qazan aıyna josparlanǵan 3 510 tonnanyń 70 paıyzy alyndy.

Foto: Kazinform/Ǵaısaǵalı Seıtaq

"Qalǵan 800 tonna suıytylǵan munaı gazy aıdyń aıaǵyna deıin beriledi. Al Atyraý oblysy atalǵan kásiporynnan kózdelgen gazdyń 93 paıyzyn aldy. Aldaǵy aıda "Jaıyqmunaı" JShS-dan BQO-ǵa 4 030 tonna suıytylǵan gaz alý josparlanýda. Al Atyraý munaı óńdeý zaýyty iske qosylǵannan keıin atyraýlyqtar ózderinen alatyn bolady", dedi B.Mýsın.

Suıytylǵan gaz tapshylyǵy Atyraý munaı óńdeý zaýytynyń josparly jóndeý jumystaryna baılanysty jabylýynan keıin týyndaǵany belgili.

Foto: Kazinform/Ǵaısaǵalı Seıtaq

«Qazirgi ýaqytta Atyraý munaı óńdeý zaýyty jóndeýdi aıaqtap, óńdeý qondyrǵylaryn iske qosýmen jumystanýda. Qondyrǵylar birtindep tehnologııalyq rejımge shyǵarylyp, óńdeý kólemi ulǵaıtylady. Al óńirge AI 92 benzıniniń jetkizilýi qalypty jaǵdaıda», dedi basqarma basshysynyń orynbasary.

Eske sala keteıik, budan buryn Batys Qazaqstan oblysynda suıytylǵan gaz tapshylyǵy týyndaǵanyn jazǵan bolatynbyz.

Sondaı-aq Batys Qazaqstanda gazben qosa benzın tapshylyǵy týyndady.