Batys Qazaqstanda evakýatsııalyq qosyndarda 570-ke jýyq adam qalyp otyr
BQO TJ departamenti bastyǵynyń orynbasary Anar Bısenovanyń Kazinform tilshisine málim etkenindeı, tótenshe jaǵdaılar kúshti jeldiń saldarynan elektr qýatynyń úzilýi, shatyrdyń ushýy, sý tasqyny, mal azyǵynyń jetispeýshiligine baılanysty engizildi. Anar Orynǵalıqyzynyń sózine qaraǵanda, kóktemgi sý tasqyny kezinde 14 myńnan astam adam evakýatsııalansa, sonyń 5 myńy balalar edi.
«Qazirgi kezde ýaqytsha ornalastyrý oryndarynda 568 adam qalsa, sonyń 235-i – balalar. Óńirde sý tasqynynan keıingi jumystar jalǵasyp jatyr. Aıtalyq, Oral qalasynda «Stenovık» baý-baqsha seriktestiginde sý sorylyp jatyr. Saıajaılardan barlyǵy 12 mln tekshe sý soryldy. Oblysta tótenshe jaǵdaı zardaptaryn joıýǵa 18 mlrd teńge shamasynda qarajat bólindi. Qala men aýdandarda sý tasqynynan zardap shekken turǵyndarǵa 775 úı salý kózdelse, sonyń aldy paıdalanýǵa berilip jatyr. Buǵan jergilikti 56 merdigerlik uıym jumyldyryldy. Oryndalǵan jumystar kólemi – 70 paıyz», - deıdi A.Bısenova.
Departament bastyǵy orynbasarynyń aıtýynsha, oblys boıynsha 12 552 otbasyǵa (árqaısysyna 100 AEK-ten) 4,6 mlrd teńge kóleminde áleýmettik kómek kórsetildi. Múliktik nuqsandy óteý boıynsha 11 756 ótinish túsip, 9 848 otbasyǵa 3,8 mlrd teńge tólem jasaldy.
«2025 jylǵa arnalǵan ınjenerlik jumystar jospary aıasynda 61 eldi mekendi bolýy yqtımal sý tasqynynan qorǵaý baǵytynda 90 is-shara josparlanǵan. Kúni búgin jalpy uzyndyǵy 17,2 km qorǵanys bógetterin salýdy qosa alǵanda, 9 is-shara oryndaldy. 23-i boıynsha jumystar bastalsa, qalǵan 58 is-sharaǵa qarajat bólý máselesi qarastyrylyp jatyr. Qosymsha Shaǵan, Krýtenkaıa, Embýlatovka, Barbastaý, Qaldyǵaıty ózenderinde 9 gıdrobeket ashý kózdelgen. Sondaı-aq jergilikti atqarýshy organdarmen birlese otyryp, oblystyq bıýdjet esebinen sý qoımalarynyń tolyǵýyn baqylaý úshin radıolokatsııalyq kamera jáne sý tasqynyna qarsy is-sharalarǵa arnalǵan jańa jabdyqty ornatý máselesi qaralyp jatyr. «Qazsýshar» mekemesi arqyly respýblıka menshigindegi 14 gıdrotehnıkalyq qurylysty zamanaýı sırena-daýys qurylǵylarymen jabdyqtaý oılastyrylyp jatyr», - dedi A.Bısenova.
Eske sala keteıik, budan buryn BQO-da sýǵa ketken aýmaqtarda 350 oqýshyǵa oqý quraly tabys etilgenin jazǵan edik.