Batys Qazaqstanda eldi mekender gazben qalaı qamtylyp otyr

<p>ORAL. KAZINFORM &ndash; Batys Qazaqstan oblysynyń halqy tabıǵı gazben 99,7 paıyzǵa qamtamasyz etilgen. Al 413 aýyldyń 366-syna nemese 88,6 paıyzyna tabıǵı gaz qubyry tartylǵan.</p>

BQO energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáıdiń málim etkenindeı, óńirde gazdandyrylmaǵan 47 eldi meken bar. Biraq bulardyń bárinde de turǵyndar sany 50 adamnan kem. Keıbireýlerinde 2-3 úı ǵana qalǵan.

Mıras Rústemulynyń sózine qaraǵanda, ótken jyly 7 eldi meken tabıǵı gazǵa qol jetkizdi. 

«Qazirgi tańda Jańaqala aýdanynda Aqqus, Úshkempir, Tasqalada Órken aýylyn gazdandyrý boıynsha jobalaý-smetalyq qujattama jasaqtaldy. Oǵan qosa Báıterekte Bogatsk, Zabrodıno, Spartak, Aqjaıyqta Qadyrqul eldi mekenine gaz jetkizý úshin atalǵan qujattama ázirlenýde. Sondaı-aq Báıterekte Razdolnoe aýylyn gazdandyrý, Oralǵa qarasty Derkól kentinde avtomattandyrylǵan gaz taratý stantsııasyn salý úshin jobalar saraptamadan ótkizilýde», - dedi M.Múlkáı.

Basqarma basshysynyń aıtýynsha, Aqqus, Úshkempir jáne Órken aýyldaryn gazben qamtý jobalary boıynsha 415 mln 903 myń teńgege bıýdjettik ótinimder berilgen.

«Oral qalasyndaǵy Derkól kentinde avtomattandyrylǵan gaz taratý stantsııasy men gaz burý qubyryn salý úshin 2 mlrd teńgege bıýdjettik ótinim berildi. Sonymen qatar «BQO Aqjaıyq, Terekti jáne Báıterek aýdandarynyń eldi mekenderin gazben jabdyqtaý úshin joǵary qysymdy gaz qubyry qurylysynyń birinshi kezeńi» jobasy boıynsha jobalaý-smetalyq qujattama ázirleý aıaqtalýda», - dedi M.Múlkáı. 

Eske sala keteıik, budan buryn Oral qalasynda jylý jelileriniń teń jartysy tozǵanyn jazǵan bolatynbyz.