Batys Qazaqstanda 74 myń gektar jer memleket menshigine qaıtaryldy

<p>ORAL. KAZINFORM &ndash; Batys Qazaqstan oblysynda qalalyq jáne aýdandyq jer qatynastary salasyndaǵy ýákiletti organdar bıyl 74 myń gektar aýyl sharýashylyǵy maqsatyndaǵy jerdiń paıdalanylmaı jatqanyn anyqtady.</p>

BQO jer qatynastary basqarmasynyń basshysy Nurjan Maqsotovtyń óńirlik kommýnıkatsııalar qyzmeti alańynda ótken brıfıngide málim etkenindeı, atalǵan jer telimderi túgeldeı memleket menshigine qaıtaryldy.

Nurjan Erbolatulynyń sózine qaraǵanda, qazirgi tańda aýyl sharýashylyǵy maqsatyndaǵy jerlerdi aınalymǵa engizý maqsatynda oblys boıynsha konkýrstar ótkizilýde.

«Bıyl aýdandarda jergilikti atqarýshy organdar jalpy kólemi 92,2 myń gektar 169 jer telimi boıynsha 30 konkýrs ótkizdi. Nátıjesinde 83,6 myń gektar 148 jer telimi ony maqsatyna saı paıdalanamyn deýshilerge tabystaldy. Oǵan qosa aýdandarda 29,4 myń gektar 44 jer telimi boıynsha 8 konkýrsty ótkizý josparlanýda», - dedi N.Maqsotov. 

Basqarma basshysynyń aıtýynsha, sonymen qatar jergilikti atqarýshy organdar kommertsııalyq maqsatta jer telimderin berý maqsatynda aýktsıondar ótkizip keledi. Osy kezge deıin 54 myń gektar 109 jer telimi boıynsha 64 aýktsıon máresine jetti. Aýktsıondardy elektrondy túrde ótkizý saýda-sattyqtyń ashyqtyǵy men qoljetimdiligin, básekelestik deńgeıiniń joǵarylaýyn jáne uıymdastyrýshylar ýaqytynyń únemdelýin qamtamasyz etýge septesýde. 

«Sol sekildi ótken jylǵy 9 qazannan bastap Oral jáne Aqsaı qalalary boıynsha jergilikti atqarýshy organdar jer ýchaskelerin berýge ótinimderdi tek elektrondyq túrde biryńǵaı memlekettik jyljymaıtyn múlik kadastry aqparattyq júıesi arqyly qabyldaıdy. Oǵan qosa óńirlik geoaqparattyq júıesi (geoportal) platformasynda qajetti kelisýler júrgiziledi, solardyń nátıjeleri boıynsha jergilikti atqarýshy organdar jer telimderin berý týraly sheshim qabyldaıdy. 2024 jylǵy 4 qazandaǵy málimet boıynsha Aqsaı jáne Oral qalalary boıynsha jer telimderin alýǵa 2 599 ótinim berilse, sonyń 879-y maquldanyp, 287-si óńdelýde. Al 1 433 ótinim boıynsha bas tartyldy. Jaıylym týraly aıta ketsek, oblys boıynsha bıylǵy jyl basyndaǵy jeke qosalqy sharýashylyqtardaǵy mal basyna sáıkes 25 myń gektar jaıylym jeriniń jetispeýshiligi baıqalyp otyr», - dedi N.Maqsotov.

Eske sala keteıik, budan buryn Batys Qazaqstanda ıgerilmegen 119 myń gektar aýyl sharýashylyǵy jeriniń memleketke qaıtarylǵanyn jazǵan bolatynbyz.