Batys Qazaqstanda 50-den astam adam AITV ınfektsııasyn juqtyrǵan

<p>ORAL. KAZINFORM &mdash; Batys Qazaqstan oblysynda osy kezge deıin AITV (VICh) ınfektsııasyn juqtyrǵan 1 119 adam tirkelse, sonyń 66,8 paıyzy &ndash; er, 33,2 paıyzy &ndash; áıel adamdar. Bul 100 myń adamǵa shaqqanda, 161,4-ten keledi.</p>

BQO AITV ınfektsııasynyń aldyn alý ortalyǵynyń dırektory Aqtilek Ómirbaevtyń málim etkenindeı, bıylǵy on aıda 53 adam atalmysh ınfektsııany juqtyrǵan, bul 100 myń turǵynǵa shaqqanda, 7,7 (2023 jylǵy osy kezeńde – 9,5), ótken jylǵydan 13 derekke azaıǵan. Sonyń ishinde erlerdiń úles salmaǵy 62,3 (33), áıelderdiki 37,7 (20) paıyz bolyp otyr.

A.Ómirbaevtyń sózine qaraǵanda, AITV ınfektsııasy Oral qalasynda (69,8 paıyz) kóbirek anyqtalýda. Aýdandardyń ishinde naýqastardyń eń kóp sany Bórli aýdanynda – 13,2 paıyz, Báıterekte – 5,7, Aqjaıyq, Terektide – 3,8, Bókeı ordasy men Kaztalovta – 1,9 paıyz. Bul juqpaly derttiń shalǵaı aýyldarda da taralyp otyrǵanyn kórsetedi.

«Aýyrǵandardyń basym bóligi nemese 62,3 paıyzy (2023 jylǵy 10 aıda – 60,6 paıyz) ınfektsııany geteroseksýaldyq jynystyq jolmen juqtyrǵan. Sondaı-aq 11,3 paıyzy (ótken jyly osy kezeńde – 7,6) gomoseksýaldyq jynystyq jolmen, 24,5 paıyzy (24,2) ınektsııalyq esirtkini paıdalanǵan kezde parenteraldy jolmen keselge tap bolǵan. Dúnıejúzilik JITS-ke qarsy kúres kúniniń aıasynda Batys Qazaqstan oblystyq AITV ınfektsııasynyń aldyn alý ortalyǵy jyl saıyn túrli profılaktıkalyq is-sharalardy ótkizedi», deıdi ortalyq basshysy.

Onyń aıtýynsha, óńirde osy ortaǵa jatatyn toptar ókilderiniń 90 paıyzdan astamy AITV-ǵa testileýden ótkizilgen.

Eske sala keteıik, budan buryn vırýstyq menıngıtpen aýrýhanaǵa júginýshiler sany 3,7 esege artqanyn jazǵan bolatynbyz.