Batys Qazaqstanda 326 dáriger jetispeıdi

<p>ORAL. KAZINFORM &ndash; Batys Qazaqstan oblysynda 326 dáriger jetispese, sonyń 205-i qalalyq, 121-i aýdandyq uıymdarǵa qajet.</p>

BQO densaýlyq saqtaý basqarmasynyń basshysy Madııar Óteshevtiń óńirlik kommýnıkatsııalar qyzmeti alańynda ótken brıfıngte málim etkenindeı, oblysta kadr tapshylyǵyn tómendetý maqsatynda birqatar júıeli sharalar qabyldanýda.

Madııar Amangeldiulynyń sózine qaraǵanda, óńirge medıtsına mamandaryn tartý maqsatynda ıntern jáne rezıdenttermen kezdesý ótkizilip turady. Sondaı-aq barlyq bos jumys oryndary men usynylatyn áleýmettik paketter týraly aqparat «Enbek.kz» portalynda ornalastyrylǵan.

«Jyl basynan beri oblysqa 31 maman kelip, jumysqa ornalastyrylsa, sonyń 23-i aýyldyq jerlerge jiberildi. Oǵan qosa bıyl jalpy medıtsına mamandyǵy boıynsha jergilikti qazyna qarjysy esebinen 60, rezıdentýraǵa 23, respýblıkalyq bıýdjetten rezıdentýraǵa 286 grant bólýge ótinim berildi»,-deıdi M.Óteshev.

Basqarma basshysynyń aıtýynsha, oblys ákimdigi tarapynan medıtsına qyzmetkerlerin áleýmettik qoldaý aıasynda birqatar qoldaýlar kórsetilýde.

Bıylǵa deıin oblys ortalyǵynan 500 jáne odan kóp shaqyrym qashyqtyqta ornalasqan aýdandarǵa barǵan jas mamandarǵa 5 mln, 300 shaqyrym jerdegilerge – 2,5 mln, jaqyn mańdaǵylarǵa – 1,5, qaladaǵylarǵa 1 mln teńge berilip kelgen edi. 

BQO máslıhatynyń 2024 jylǵy 16 aqpandaǵy sheshimimen bul qarjy kólemi edáýir kóbeıtildi.

Atap aıtqanda, qalada ornalasqan mamandar 1,5 mln teńge, aýdandyq medıtsınalyq uıymdarǵa jiberilgender úshin qashyqtyǵyna qaraı 2,5 mln teńgeden 8 mln teńgege deıin qarastyrylǵan. 

«Bıyl 18 maman birjolǵy kótermeaqymen qamtamasyz etilse, sonyń 13-i – aýylǵa barǵandar. 10 dárigerge qyzmettik turǵyn úı berildi. Ótken jyly 92 mamanǵa (47-si aýylda) qoldaý kórsetilip, 33-i baspanaly boldy. Mundaı qoldaý aldaǵy ýaqytta da jalǵasady»,-dedi M.Óteshev.

Basqarma derekteri boıynsha qazirgi tańda oblysta densaýlyq saqtaý mınıstrligi júıesiniń medıtsınalyq uıymdarynda 1 756 dáriger jáne 6 650 orta býyn qyzmetkeri jumys jasaıdy.

Óńirde 2024 jyly densaýlyq saqtaý júıesin qarjylandyrýǵa 96 mlrd teńge (munyń 83,9 mlrd teńgesi áleýmettik medıtsınalyq saqtandyrý qory, 12,1 mlrd teńgesi oblystyq basqarma arqyly) bólindi.

Bul ótken jylǵydan (92,5 mlrd teńge) 3,8 paıyzǵa artyq.

Eske sala keteıik, budan buryn Madııar Óteshevtiń BQO densaýlyq saqtaý basqarmasyn basqaratynyn jazǵan bolatynbyz.