Batys Qazaqstanda 302 myń tonna astyq jınaldy

<p>Batys Qazaqstan oblysynda egin orý naýqany aıaqtalyp, 302 myń tonna astyq jınaldy. Bul týraly óńir ákimi Narıman Tóreǵalıev aıtty, dep habarlaıdy Kazinform agenttigi.</p>

Ákimniń aıtýynsha, Batys Qazaqstan oblysy boıynsha barlyq aýyl sharýashylyǵy daqyldarynyń egis alqaby 617 myń gektardy qurady. Maıly daqyldardan 75 myń tonna ónim alyndy. Sondaı-aq, 153 myń tonna kartop, kókónis-baqsha ónimi jınaldy.

«Oblysta qýaty jylyna 11 myń tonnalyq gollandııalyq tehnologııamen 2 zamanaýı óndiristik jylyjaı jumys istep tur. Búginde oblys halqyn qyzanaq pen qııarmen tolyqtaı qamtýdamyz. Oblystyń maýsym aralyq kezeńde kartop-kókónis ónimderin saqtaý qajettiligi 70 myń tonnany qurap otyr. Osy jyly 91 myń tonna kartop-kókónis ónimderi jınalyp, zamanaýı úlgidegi 32 kartop-kókónis qoımalasynda saqtalýda. Oblys halqynyń kókónis ónimderine qajettiligin 100% jabý úshin kelesi jyly 18 myń tonnalyq 4 qoıma salynyp qajettilik tolyq jabylady», - dedi N. Tóreǵalıev Astanada Ortalyq kommýnıkatsııalar qyzmetinde.

Sonymen birge, 2026 jylǵa deıin 30 myń tonnalyq 17 qoıma salý kózdelgen.

«Agroónerkásip kesheninde 2023-2026 jyldarǵa 89 mlrd teńgege 40 ınvestıtsııalyq joba josparlansa, bıyl 6 mlrd teńgege 15 ınvestıtsııalyq joba júzege asyrylýda», - deıdi BQO ákimi.

Buǵan deıin BQO ákimi óńirdegi kıik sanyn retteý jumystary týraly pikir bildirgen edi.