Batys Qazaqstanda 21 myńnan astam adam JRVI-men syrqattanǵan
BQO sanıtarııalyq-epıdemıologııalyq baqylaý departamenti basshysynyń mindetin atqarýshy Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, bul kórsetkish ótken jylǵy osy kezdegiden 19,8 paıyzǵa tómen.
Nurlybek Ermekulynyń sózine qaraǵanda, syrqattanǵandardyń kópshiligi, ıaǵnı 14 713-i – 14 jasqa deıingi balalar. Sonyń ishinde 173-i – 1 jasqa deıingiler. Sondaı-aq 31 júkti áıel, 714 oqýshy JRVI-men aýyrǵan.
«Osy kezeńde oblysta tumaý tirkelgen joq. Degenmen tumaý tárizdes vırýstardan adenovırýs, rınovırýs, bokovırýs, paragrıpp, pandemııalyq emes koronavırýs anyqtaldy. Tumaýǵa qarsy egý 1 qazannan bastap ambýlatorııalyq-emhanalyq kómek kórsetetin barlyq medıtsınalyq mekemelerde júrgizildi. Búgingi tańda oblystyń 68 myń turǵyny tumaýǵa qarsy egýmen qamtyldy. Onyń ishinde sozylmaly aýrýlary bar 3 087 bala jáne 21 067 eresek adam, 7 947 medıtsına qyzmetkeri, 1 038 júkti áıel, 455 oqýshy vaktsına aldy», deıdi N.Mustaev.
Onyń aıtýynsha, óńirde qyzylsha men kókjótel boıynsha epıdemıologııalyq jaǵdaı turaqty, syrqattanýshylyqtyń tómendegeni baıqalady. Qarashanyń 11-indegi málimet boıynsha 1 265 adamnyń qyzylshaǵa, 41 adamnyń kókjótelge shaldyqqany rastaldy.
«JRVI-dyń taralýyna jol bermeý úshin ózdiginen emdelmeý qajet. Aýrýdyń alǵashqy belgileri paıda bolǵan kezde-aq mindetti túrde turǵylyqty jerdegi medıtsınalyq mekemege habarlasyp, dárigerdiń kómegine júginý kerek. Sondaı-aq saqtyq sharalaryn da umytpaǵan abzal», dedi N.Mustaev.
Eske sala keteıik, budan buryn Batys Qazaqstan oblysynyń bas memlekettik sanıtar dárigeri qyzmetinen ketkenin jazǵan edik.