Batys Qazaqstanda 20-dan astam jańa mektep salynyp jatyr
BQO bilim basqarmasynyń basshysy Aıgúl Myńbaevanyń málim etkenindeı, oblys boıynsha bıyl barlyǵy 27 mektep qurylysy josparlansa, sonyń 16-syn jyl sońyna deıin bitirý kózdelýde.
Bulardyń 15-i «QPO b.v.» kompanııasynyń áleýmettik mindettemeleri aıasynda, bir mektep bıýdjet qarajaty esebinen, 9-y «Jaıly mektep» ulttyq jobasyna sáıkes qolǵa alyndy. Osy kezge deıin Kaztalov aýdany Juldyz aýylynda 108 oryndyq, Báıterek aýdany Jalyn eldi mekeninde 54 oryndyq jáne Terektiniń Poımasynda 108 oryndyq mektep paıdalanýǵa berildi.
Basqarma basshysynyń sózine qaraǵanda, «Jaıly mektep» pılottyq ulttyq jobasy aıasynda Batys Qazaqstan oblysynda barlyǵy 16 200 oryndyq 18 mektep qurylysy josparlansa, sonyń 9-y – 2023-2024, qalǵan jartysy 2024-2025 jyldary salynyp bitpek. Osy ǵımarattar esebinen oblystaǵy oqýshy orny tapshylyǵyn, úsh aýysymdy jáne apatty mektepter máselesin sheshý oılastyrylýda.
«Kúni búginge deıin «Samruk-Kazyna Construction» AQ men BQO ákimdigi arasynda kontsortsıýmdyq kelisim-sharttarǵa qol qoıylyp, 9 mekteptiń qurylysyn júrgizýge merdigerler anyqtalǵan edi. Alaıda Aqsaı qalasynda M.Yqsanov kóshesi boıyndaǵy 300 oryndyq №1 jáne 13-shaǵynaýdandaǵy 900 oryndyq mektep qurylysy merdigeriniń belgilengen mindettemelerin oryndamaýyna baılanysty aradaǵy kelisim-shart buzyldy. Merdigerdi anyqtaý úshin konkýrs qaıtadan ótkiziledi», - dedi A.Myńbaeva.
Sonymen qatar 2022 jyly 19 bilim berý nysanyna kúrdeli jóndeý júrgizýge 4 543,1 mln teńge bólinip, sonyń 12-sinde (8 mektep, 1 ınternat, 2 kolledj, 1 qosymsha bilim berý) jumys aıaqtalsa, 7 nysan 2023 jylǵa aýysqan edi.
«Bıyl 2 mektepti (Bókeı ordasy aýdany Jáńgir han mektebi, Kaztalov aýdany Kaztalov mektep-lıtseıi) kúrdeli jóndeý máresine jetti. Taǵy ekeýinde (Tasqala aýdany Amangeldi mektep-bóbekjaı-balabaqsha kesheni, Báıterek aýdanynyń Chývashın mektebi) nysandy qabyldaý jumystary júrgizilýde. Qazirgi ýaqytta Aqjaıyq aýdanynyń Bazartóbe, Báıterek aýdanynyń Razdolnoe mektebin kúrdeli jóndeý jumystary júrgizilýde. Bul ekeýin jyl sońyna deıin aıaqtaý josparlanyp otyr», - dedi A.Myńbaeva.