Batys Qazaqstanda 2 myńǵa jýyq adam ıt pen mysyqtan zardap shekti

<p>ORAL. KAZINFORM &ndash; Batys Qazaqstan oblysynda bıylǵy toǵyz aıda 1 959 adam ıt-mysyq jáne basqa janýardan zardap shekti.</p>

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, bul ótken jylǵydan (1 793) kóp bolyp otyr. 

Onyń sózine qaraǵanda, 1 537 adam ıtke, 357-si mysyqqa jáne 65-i basqa janýarǵa tistelip, tyrnalyp nemese solardan silekeı juqtyrǵan.

«Barlyq janýar veterınarııa mamandarynyń baqylaýyna alynyp, qutyrý aýrýyna shaldyqpaǵany anyqtaldy. Zardap shekken 1 959 adamnyń 1 954-i antırabııalyq kómek aldy. Qazirgi tańda oblys boıynsha janýardyń tisteýinen, tyrnaýynan jáne silekeıinen paıda bolatyn qutyrý aýrýy tirkelmedi», - dedi N.Mustaev.

Foto: Ǵaısaǵalı Seıtaq

BQO veterınarııa basqarmasy basshysynyń orynbasary Nurqaıyr Qusaıynovtyń naqtylaýynsha, oblys aýmaǵynda qańǵybas úı janýarlaryn aýlaý, bıosterılızatsııalaý jumystarymen jergilikti veterınarlyq stantsııalar aınalysady. Oralda qalalyq veterınarlyq stantsııa aýlaý, al Jáńgir han atyndaǵy agrarlyq-tehnıkalyq ýnıversıteti janyndaǵy qoǵamdyq uıym ıt-mysyqty ýaqytsha ustaý jáne bıosterılızatsııalaý sharalaryn atqarady.

Bıyl 5 203 qańǵybas ıt-mysyq aýlanyp, 3 084-i bıozararsyzdandyrylyp, mekendeý ortasyna keri qaıtaryldy. 2 119 buralqy ıt turǵyndardyń ótinishi negizinde jansyzdandyryldy.

N.Qusaıynovtyń aıtýynsha, kúni búgin úı janýarlaryna arnalǵan biryńǵaı derekqorda oblys boıynsha 24 030 chıptelgen ıt, mysyq tirkelse, sonyń 6 388-iniń ıesi ǵana bar. 

Oblysta 2023 jyldyń 1 qyrkúıeginen bastap Zań talaptaryna saı úı janýarlaryn mindetti esepke alý jumystary júrgizilýde. Janýarlardy tirkeýge qoıý jáne sterılızatsııalaý sharalary memlekettik veterınarııalyq uıymda nemese veterınarııalyq emhanalarda aqyly túrde júrgiziledi. Bul qyzmettiń quny verınarııalyq stantsııalarda – 1 myń, al jeke veterınarııalyq klınıkalarda – 1 500-2 500 teńge. Eger janýar ıesi áleýmettik az qamtylǵan topqa jatatyn bolsa, tirkeýge qoıý veterınarııalyq stantsııalarda tegin júrgiziledi. 

«Qazirgi ýaqytta óńirde veterınarııalyq stantsııalarǵa tıesili ýaqytsha ustaýǵa arnalǵan 12 oryn (syıymdylyǵy – 180), Jáńgir han atyndaǵy BQATÝ-da taǵy bireýi (75 oryn) jáne janýarlardy qorǵaý uıymdaryna tıesili 6 panajaı bar. Bul baǵytta Oral qalasyna qarasty Krýgloozernyı aýylynda bos turǵan ǵımaratty jóndep, ıesiz ıtterge arnalǵan jańa panajaı ǵımaratyn jasaqtaý kózdelip otyr. Kúni búgin qurylystyń jobalyq-smetalyq qujattary daıyndalý ústinde», - dedi N.Qusaıynov. 

Oral qalasynyń turǵyny Orynaı Smaǵulova Oralda ıtterdiń kóbeıip ketkenin, qańǵybas ıtterdiń máselesi áli sheshimin tappaı otyrǵanyn aıtty. 

«Qalada ıtterdiń kóbeıip ketkeni eshkimge jasyryn emes. Ásirese, aıaldamalarda, mektep, úılerdiń aýlalarynda órip júredi. Kúshiktep jatqany qanshama. Nemerelerimizdi qaýip ala ma dep qorqamyz. Bir balanyń qasynda 5-6 ıt júredi. Kez kelgen ýaqytta shabýyl jasaýy múmkin ǵoı. Qanshama aıtylyp jatsa da, qańǵybas ıt máselesi sheshiler emes. Osyny nege durystap qolǵa almaıdy?», - dedi ol. 

Eske sala keteıik, budan buryn Oralda qoıǵa shapqan ıttiń ıesi anyqtalyp, jaýapqa tartylǵanyn jazǵan bolatynbyz.