Batys Qazaqstanda 145 mln teńge sýbsıdııa zańsyz berilgen

<p>ORAL. KAZINFORM — BQO prokýratýrasy agroónerkásip kesheninde 2020 jyldan bergi kezeńde sýbsıdııa tóleýge bólingen bıýdjet qarjysyn jumsaýdyń zańdylyǵyn tekserdi.</p>

BQO prokýratýrasynyń baspasóz qyzmetinen málim etkenindeı, atalǵan ýaqytta oblystyq aýyl sharýashylyǵy basqarmasymen 52 948 ótinim boıynsha aýyl sharýashylyǵy taýaryn óndirýshilerge 79,2 mlrd teńge (2020 jyly — 13,2 mlrd, 2021 jyly — 14,2 mlrd, 2022 jyly — 16,8 mlrd, 2023 jyly — 16,5 mlrd, bıyl jyl basynan beri 36,6 mlrd teńge) sýbsıdııa tólengen.

Taldaý barysynda anyqtalǵanyndaı, keıbir kásipkerlerge sýbsıdııa zańsyz berilgen, sondaı-aq birqatary tehnıka men mal boıynsha mindettemelerin oryndamaǵan.

Atap aıtqanda, QR Aýyl sharýashylyǵy mınıstriniń 2019 jylǵy 15 naýryzdaǵy № 108 buıryǵymen bekitilgen Asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalarynyń 2-qosymshasyna sáıkes ótinim bergen sátte sharýashylyqtaǵy analyq mal basynan týmaǵan bordaqylaý alańdaryna nemese etti qaıta óńdeý kásiporyndaryna ótkizilgen nemese ornyn aýystyrǵan buqashyqtar men qoshqarlar sýbsıdııalaýǵa jatpaıdy.

Soǵan qaramastan, osy talapqa saı kelmeıtin 13 aýyl sharýashylyǵy taýaryn óndirýshige mal baǵasyn arzandatýǵa 25 mln teńge kóleminde sýbsıdııa tólengen.
Sonymen qatar, aýyl sharýashylyǵy taýaryn óndirýshilerdiń sýbsıdııa tólengen taýarly analyq mal basyn saqtaýdy qamtamasyz etý jónindegi mindettemelerin oryndamaǵany anyqtaldy. Mysaly, «D» sharýa qojalyǵy 250 bas sıyrǵa selektsııalyq jáne asyldandyrý jumystaryn júrgizý úshin 2,5 mln teńge sýbsıdııa alǵan. Biraq esepti merzim bitkenge deıin atalǵan qojalyq 92 analyq mal basyn esepten shyǵarǵan.

— Barlyǵy 163 qojalyq iri qara basyn saqtaý jónindegi mindettemelerin oryndaýǵa qatysty 127 mln teńge kóleminde buzýshylyqqa jol bergen. Sondaı-aq, usaq mal basyn saqtaýdy qamtamasyz etpegen 21 qojalyq 12 mln teńgege buzýshylyqqa barǵan. Buzýshylyqtardyń qorytyndysy boıynsha oblystyq aýyl sharýashylyǵy basqarmasyna 145 mln teńge sýbsıdııany memleketke qaıtarý jóninde qadaǵalaý aktisi engizildi. Ázirge sonyń 8,3 mln teńgesi qaıtaryldy. Qalǵan 127 aýyl sharýashylyǵy taýaryn óndirýshige qatysty atalǵan basqarma talap aryzdy sotqa berýdi ázirleýde, — dep habarlady vedomstvodan.

Eske sala keteıik, budan buryn BQO-da sýbsıdııaǵa berilgen 20 mln astam teńgeniń maqsatsyz paıdalanylǵanyn jazǵan bolatynbyz.