Batys Qazaqstanda 140-qa jýyq bala pnevmonııadan emdelip jatyr

<p>ORAL. KAZINFORM &mdash; Batys Qazaqstan oblysy aýrýhanalarynda 138 bala pnevmonııadan em alýda.</p>

BQO densaýlyq saqtaý basqarmasynyń baspasóz qyzmetinen málim etkenindeı, sonyń ishinde 39-y oblystyq juqpaly aýrýlar aýrýhanasynda, qalǵan 99-y oblystyq kópbeıindi balalar aýrýhanasynda jatyr.

Patsıentter arasynda kóp jaǵdaıda pnevmonııanyń bronhoobstrýktıvti, segmenttik jáne lobaldy (ókpeniń ishinara qabynýy) túrleri oryn alyp otyr.

Basqarma málimetine qaraǵanda, oblystyq kópbeıindi balalar aýrýhanasynyń qabyldaý bólimshesine kúnine orta eseppen 15-20 bala túsedi. Em alǵan sonsha bala jazylyp shyǵady. 

- Oblystyq juqpaly aýrýlar aýrýhanasyna sońǵy táýlikte 30 bala júginip, olardyń 15-i jatqyzyldy. Oblystyq jedel medıtsınalyq járdem stantsııasynyń 103 operatoryna joǵary temperatýra, jedel respıratorlyq vırýstyq ınfektsııalar boıynsha táýligine ortasha eseppen 250 balaǵa shaqyrtý jasalady. Osyǵan oraı BQO densaýlyq saqtaý basqarmasy turǵyndarǵa aldaǵy mereke kúnderi balalarmen, sonyń ishinde 5 jasqa deıingi baldyrǵandarmen halyq kóp jınalatyn oryndarǵa barmaýdy usynady, - dep habarlady vedomstvodan.

Eske sala keteıik, budan buryn Batys Qazaqstanda shoshqa tumaýyna shaldyqqan balalar sany 16 paıyzǵa kóbeıip ketkenin jazǵan bolatynbyz.