Batys Qazaqstan oblysynyń Qaratóbe aýdanynda sý tasqynynan 400-ge jýyq adam qutqarylyp jatyr

<p>QARATÓBE. KAZINFORM &ndash; 27 naýryz kúni Batys Qazaqstan oblysynyń Qaratóbe aýdany Qorjyn aýyly tasqyn sýdyń astynda qaldy. Oblys ákimi Narıman Tóreǵalıev Tótenshe jaǵdaılar departamentiniń mamandarymen birge tikushaqpen atalǵan eldi mekenge baryp, turǵyndardy qutqarý jumystaryna jetekshilik etti.</p>

Óńir basshysy aýyl halqymen kezdesip, olarǵa memleket tarapynan kómek kórsetiletinin aıtty. 

Foto: BQO ákimdiginiń baspasóz qyzmeti

«Barshańyzdy sabyrǵa shaqyramyn. Tabıǵı apat saldarynan oblystyń birneshe aýdany zardap shegip jatyr. Sizderge kelgen shyǵyn boıynsha arnaıy komıssııa qurylady. Keltirilgen zalaldyń bári esepteledi. Memleket tarapynan tıisti kómek beriledi. Qazir sizderdi tótenshe jaǵdaılar qyzmetiniń mamandarymen birge sý tasqynynan qutqarýǵa keldik. Tikushaqpen barshańyzdy aýdan ortalyǵy Qaratóbege, qaýipsiz jerge jetkizemiz», - dedi oblys ákimi.

Qorǵanys mınıstrliginiń mamandary, Tótenshe jaǵdaılar mınıstrliginiń qutqarýshylary 400-ge jýyq aýyl turǵynyn tikushaqpen aýdan ortalyǵyna jetkizý jumystaryn júrgizip jatyr. 

Foto: BQO ákimdiginiń baspasóz qyzmeti

Birinshi kezekte balalar men áıelder, densaýlyǵy nashar jáne múgedektigi bar jandar jetkizildi.

Atap óterligi, Batys Qazaqstan oblysyndaǵy sý tasqynynyń aldyn alýǵa kórshi oblystardan mamandar men kúsh quraldary jumyldyryldy.