Batys Qazaqstan oblysynda suıytylǵan gaz tapshylyǵy týyndady

<p>ORAL. KAZINFORM — Batys Qazaqstan oblysynda suıytylǵan munaı gazy jetispeı otyr. Oral qalasyndaǵy gaz bar degen avtogaz quıý stansalarynyń ózinde júrgizýshiler kezekke turýǵa májbúr.</p>

BQO energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáıdiń óńirlik kommýnıkatsııalar qyzmeti alańynda ótken brıfıngte málim etkenindeı, Atyraý munaı óńdeý zaýyty qazannyń 1-inen 25-ine deıin josparly jóndeýge ýaqytsha jabyldy. Osyǵan baılanysty Energetıka mınıstrligi atalǵan zaýyt arqyly tutynýshy óńirlerdi elimizdiń basqa munaı óńdeý zaýyttaryna baǵyttady. Mıras Rústemulynyń sózine qaraǵanda, aıtalyq, qazirgi kezde Atyraý oblysy úshin «Jaıyqmunaı» JShS suıytylǵan gazdy taratyp otyr (Atyraý úshin 2 490 tonna jospar belgilengen).

Foto: Ǵaısaǵalı Seıtaq

Seriktestik táýligine 220 tonna suıytylǵan munaı gazyn, sonyń ishinde 120 tonnasyn BQO-ǵa, 100 tonnasyn Atyraý oblysyna jiberip otyr.

«Qalyptasqan jaǵdaı saqtaý bazalaryndaǵy qaldyqty azaıtyp, birqatar avtogaz quıý stansasynda gaz quıýdy shektep, talonǵa kóshýge soqtyrdy. Osyǵan baılanysty Energetıka mınıstrligi basqa kózderden qosymsha suıytylǵan munaı gazy kólemin bólý máselesin qarastyratyn bolady», — dedi Mıras Múlkáı. 

Onyń aıtýynsha, taýar bırjalarynan tys suıytylǵan munaı gazyn jetkizý josparynda Batys Qazaqstan oblysynyń ishki naryǵy úshin suıytylǵan munaı gazyn alýshy retinde 19 nysan usynylǵan. Oblys boıynsha 109 avtogaz quıý stansasy bolsa, ortasha aılyq tutyný kólemi — 4 myń-4 500 tonna.

«Batys Qazaqstan úshin tórtinshi toqsanǵa 11 566 tonna (qazanda — 3 510 tonna, qarashada — 4 030 tonna, jeltoqsanda — 4 026 tonna) suıytylǵan munaı gazyn jetkizý kózdelgen. 14 qazandaǵy málimet boıynsha «Jaıyqmunaı» JShS qazan aıynda negizgi jospar boıynsha 1 442 tonna gazdy nemese 41 paıyzyn jetkizbekshi», — dedi Mıras Múlkáı.

BQO polıtsııa departamentiniń málimeti boıynsha óńirde barlyǵy 202 937 kólik tirkelse, sonyń 22 432-si gazben jabdyqtalǵan. Ótken jylmen (15 650) salystyrǵanda 30 paıyzǵa ósip otyr. 

Foto: Ǵaısaǵalı Seıtaq

Júrgizýshilerdiń sózine qaraǵanda, «Neftek» avtogaz quıý stansalarynda gaz quıý úshin áýeli sýsyn, shokolad, shaı sekildi taýarlar satyp alý kerek.

Batys Qazaqstan oblysynda suıytylǵan gaz tapshylyǵynyń týyndaýy birinshi ret emes. Eske sala keteıik, budan buryn Batys Qazaqstanda suıytylǵan gaz tapshylyǵy týyndaǵanyn jazǵan bolatynbyz.