Batys Qazaqstan oblysynda 617 shaqyrym jol jóndelip jatyr

<p>Batys Qazaqstan oblysynyń Bókeı ordasy aýdanyn Jánibek aýdanymen jalǵaıtyn 104 shaqyrym jol jóndeldi. Bul týraly oblys ákimi Narıman Tóreǵalıev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Prezıdent elimizdiń strategııalyq mańyzy bar mindetteriniń biri – kólik-logıstıka salasynyń áleýetin tolyq paıdalanýǵa basa nazar aýdaryp, 2029 jylǵa deıin 4 myń shaqyrym jolǵa kúrdeli jóndeý júrgizýge tapsyrma berdi. Bul tapsyrma aıasynda bıyl 81,5 mlrd teńgege 617 shaqyrym jol jóndelip jatyr. Qazirgi tańda 513 shaqyrym jol jóndeldi. Jyl qorytyndysymen jergilikti joldardyń normatıvtik jaǵdaıdaǵy úlesin 52%-ǵa jetkizemiz», - dedi N. Tóreǵalıev Astanada ortalyq kommýnıkatsııalar qyzmetinde.

Ákimniń aıtýynsha, 2024 jyly 100 mlrd teńgeden astam qarjyǵa barlyq deńgeıdegi jalpy uzyndyǵy 800 shaqyrym quraıtyn 139 jobany júzege asyrý josparda bar.

«Osy jerde halyqty tolǵandyrǵan Bókeı ordasy jáne Jánibek aýdandaryn oblys ortalyǵymen baılanystyratyn aıaqtalmaı qalǵan 120 shaqyrym joldyń 104 shaqyrymyn bıyl aıaqtadyq, qalǵan 16 shaqyrym boıynsha jumys jalǵasyp jatyr», - dedi N. Tóreǵalıev.