Batys Qazaqstan oblysynda 190-nan astam pedagogtiń úıin sý basty
BQO bilim basqarmasynyń basshysy Aıgúl Myńbaevanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 39-y – Syrym aýdanynda, 30-y – Qaratóbede, 56-sy – Bórlide, 35-i – Terektide, 28-i – Oral qalasynda, tórteýi oblystyq mekemelerde jumys isteıdi.
Aıgúl Ádilgereıqyzynyń sózine qaraǵanda, tótenshe jaǵdaı jarııalanǵan óńirdiń pedagogteri attestattaýdan QR Oqý-aǵartý mınıstrligi belgilegen jekelegen merzimderde ótedi.
«Tasqyn sý saldarynan baspanasyz qalǵan 77 pedagogtiń attestattaýdan ótýi kelesi jylǵa aýystyrylady. Bilim basqarmasy qıyndyqqa tap bolǵan áriptesterimiz ben bilim alýshy balalarymyzdy kómeksiz qaldyrmaı, jan-jaqty qoldaıtyn bolamyz», dedi A.Myńbaeva.
Onyń aıtýynsha, kóktemgi sý tasqynyna baılanysty Bórli, Syrym, Qaratóbe, Terekti aýdandarynyń keıbir mektepteri evakýatsııalanyp, tórtinshi toqsannyń birinshi aptasy qashyqtyqtan oqytyldy (4132 oqýshy).
Qazirgi tańda Terekti aýdany Podstepnyı aýylyndaǵy oblystyq daryndy balalarǵa arnalǵan mamandandyrylǵan Abaı atyndaǵy mektep-gımnazııa-ınternaty (207 shákirt) evakýatsııalyq pýnkt bolýyna baılanysty qashyqtyqtan oqytylýda. Qalǵan mektepter dástúrli formatqa kóshirildi.
«Terekti» kolledjinde evakýatsııalyq pýnkt ornalasqandyqtan, 163 stýdent qashyqtan bilim alýda. Búginnen bastap H.Dosmuhamedov atyndaǵy joǵary pedagogıkalyq kolledj ben Oral «Servıs» tehnologııalyq kolledji (2 068 stýdent) evakýatsııalyq pýnktke jasaqtalyp jatqandyqtan, onlaın oqý formatyna aýystyryldy. Sý tasqynynyń bastapqy kúnderi bilim berý nysandarynda 18 evakopýnkt turǵyndardy qabyldap, qyzmet kórsetti. Kúni búgin 4 nysanda turǵyndar bar. Evakýatsııalyq pýnktteri bar bilim nysandarynyń qyzmetkerleri ýaqytpen sanaspaı, jumys jasaýda. Onda 4 mezgilden ystyq tamaq uıymdastyrylyp, jatyn oryndarmen tolyq qamtyldy», dedi A.Myńbaeva.
Kúni búgin mektep psıhologtary evakopýnktterde psıhologııalyq qoldaý jumysyn júrgizse, qosymsha bilim berý uıymynyń pedagogtary balalarǵa úıirmeler uıymdastyrýda.
Sonymen qatar bilim salasynyń qyzmetkerleri qarjy aýdarý, ózenderdiń jaǵalaýyn bekitý, tegin tasymal uıymdastyrý, sý tasqynymen kúresken qyzmetkerlerge ystyq shaı men tamaq aparý, gýmanıtarlyq kómekti jetkizý jáne basqa jumystarǵa atsalysýda.
Basqarma basshysy atap ótkenindeı, sý tasqynynan zardap shekken turǵyndardyń balalaryn bilim mekemeleri nazardan tys qaldyrmady. Bórli aýdanyndaǵy Aqsaı qalasy bilim mekemeleriniń ujymdary birigip, Aqsý jáne Araltal aýylynyń 31 balasyna, sondaı-aq Syrym aýdanynda 103 balaǵa, Qaratóbede 104 oqýshyǵa jáne 9 mektepaldy daıarlyq synybynyń tárbıelenýshilerine tolyqtaı qajetti oqý quraldary men kıim-keshekterdi alyp berdi.
Prezıdent ákimshiliginen, eriktiler qorynan, «AMANAT» partııasynan, jeke kásipkerler men ujymdardan, aýyl turǵyndarynyń ózinen balalarǵa qajetti zattardy alyp berýge 7 mln teńgeden astam qarjylaı qoldaý kórsetildi.
«Sý tasqyny kezinde Terekti aýdanyndaǵy Podstepnyı aýylyndaǵy jalpy orta bilim beretin mektebiniń jertólesi tolyqtaı sýǵa ketken bolatyn. Qazirgi ýaqytta bul mektep túgel tazartylyp, qalypty jaǵdaıǵa keltirildi. Aqaý aktileri anyqtalýda, aldaǵy ýaqytta aǵymdaǵy jóndeý jumystary júrgiziletin bolady», dep túıindedi A.Myńbaeva.
Eske sala keteıik, budan buryn Jaıyq ózeninen mol sý kelýine oraı Batys Qazaqstanda daıyndyq qalaı júrgizilip jatqanyn jazǵan bolatynbyz.
Sondaı-aq BQO-da sý tasqynynan zardap shekken aýmaqtan 185 bala respýblıkalyq lagerlerde demalady.
BQO ákiminiń orynbasary sý tasqynynan zardap shekken turǵyndardan ótinishter qabyldanyp jatyrǵanyn aıtty.
Batys Qazaqstan oblysynda 23 jol ýchaskesinde qozǵalys shektelip otyr.