Batys Qazaqstan oblysynda 16 mektep apatty jaǵdaıda dep tanylyp otyr
Departament basshysy Muhamǵalı Aryspaevtyń málim etkenindeı, qazirgi tańda oblys boıynsha 16 mektep apatty jaǵdaıda dep tanylǵan.
Onyń sózine qaraǵanda, Aqjaıyq aýdanynda M.Ótemisov atyndaǵy jalpy orta bilim beretin, Kaztalovta Qonys jáne Satybaldy aýylynyń negizgi mektepteri, Bórlide № 1 orta mektep, Pýgachev mektep-bóbekjaı kesheni, Keńtúbek, Jánibekte A.Orazbaeva, Ǵ.Qarash atyndaǵy, Tegisshil orta mektebi, Qaratóbede Jaqsybaı, Tólendegi negizgi mektepter, Tasqalada Aınabulaq mektebi, Oral qalasynda M.Mámetova atyndaǵy № 27 jáne № 43 orta mektep ǵımaraty talapqa saı kelmeıdi. Tótenshe jaǵdaılar týraly esepterdi ýákiletti organ usynǵan.
«Sonymen qatar ótken oqý jylynda oblys boıynsha 10 bilim berý uıymy úsh aýysymdyq oqytý rejımimen jumys istegen. Atap aıtqanda, Oral qalasynda № 20, 24, 30, 38, 49 orta mektepter, estetıkalyq baǵyttaǵy gımnazııa, Bórli aýdany Aqsaı qalasyndaǵy № 7 orta mektep, Báıterektegi Trekın orta mektebi jáne Q.Myrzalıev atyndaǵy qazaq orta mektebi jáne Terektidegi Podstepnyı qazaq orta mektebi osy tizimge kiredi. Óńirde atalmysh máseleni sheshý maqsatynda «Jaıly mektep» jobasy aıasynda 18 orta mekteptiń qurylysy josparlansa, olardyń toǵyzy bıyl salynýda», - dedi M.Aryspaev.
Departament basshysynyń aıtýynsha, óńirde balalardyń jazǵy demalysyna oraı 18 saýyqtyrý lageri ashyldy.
«Balalar lagerleriniń barlyǵy ashylar aldynda nysannyń normatıvtik-quqyqtyq aktiler talaptaryna sáıkestigi týraly sanıtarlyq-epıdemıologııalyq qorytyndy aldy. Olardyń bárine aı saıyn bilim berý bólimderimen birlese otyryp, zerdeleý jumystary júrgiziledi. Kúni búgin 8 lager óz jumysyn aıaqtady, bul mekemelerde balalar arasynda tamaqtan ýlaný derekteri tirkelgen joq», dedi departament basshysy.
Eske sala keteıik, budan buryn Batys Qazaqstanda balalar saýyqtyrý lagerleri sanıtarlyq tekserýden ótkizilip jatqanyn jazǵan bolatynbyz.