Batys Qazaqstan oblysynda 10 eldi meken kólik qatynasynsyz qaldy

<p>ASTANA. KAZINFORM &ndash; Batys Qazaqstan oblysynda sý tasqynynyń aldyn alý jáne qutqarý jumystary jalǵasýda. Tolyǵyraq BQO Tótenshe jaǵdaılar departamenti Aqparattyq-analıtıkalyq tobynyń aǵa ınjeneri, azamattyq qorǵaý leıtenanty Nurjan Tóleýish aıtyp berdi.</p>

«1 sáýirde sý tasqynyna baılanysty BQO-da tótenshe jaǵdaı jarııalandy, qazir qaýiptiń beti áli seıilmedi. Búginde sý tasqynynyń aldyn alý jáne qutqarý jumystary jalǵasyp jatyr. Qazirgi kúni oblys boıynsha 7900 adam, onyń ishinde 3538 bala evakýatsııalandy. Óńirde 161 evakýatsııalyq pýnkt jumys istep tur, onda 1 myńnan astam adam bar, qalǵandary týysqandyranda ornalasty. BQO boıynsha 10 eldi meken kólik qatynasynsyz qalyp otyr, biraq olar azyq-túlik qorymen qamtylǵan», - dedi Nurjan Tóleýish Ortalyq kommýnıkatsııalar qyzmeti alańynda ótken baspasóz máslıhatynda. 

Onyń aıtýynsha, oblys aýmaǵynda 1 mln tekshe metr qar sýy tartyldy. Sý aǵynyna bóget retinde 200 myńnan astam qum qap tóseldi. 

«Qutqarý jáne topan sýdyń aldyn alý jumystaryna 1900-den astam jeke quram jáne 300 tehnıka jumyldyryldy. Sonymen qatar qosymsha kómek kúshi retinde Mańǵystaý oblysy Tótenshe jaǵdaılar departamendi men Uzynaǵash áskerı bóliminiń kúshi tartyldy. Qazir Oral qalasynda 10 beket daıyndaldy, Jaıyq ózeniniń arnasy kúndelikti baqylaýda. Ózenniń sý deńgeıi 680 santımetrdi qurap otyr, al qaýipti mólsher 850 santımetr dep esepteledi. Kúndelikti monıtorıng arqyly Jaıyq ózeni sýynyń kóterilip kele jatqany baıqalady. Osy oraıda ózen mańyndaǵy adamdar qaýipsiz aýmaqtarǵa kóshirilip jatyr. Sonymen qatar turǵyndardy qulaqtandyrý sharalary júrgizilip jatyr», - deıdi ol.