Batys Qazaqstan oblysyna basty qaýip - Jaıyq ózeni sýynyń kóterilýi
«Oblys boıynsha sý tasqynynyń aldyn alý apattyq qutqarý jumystary qarqyndy jalǵasyp jatyr. Oblysymyzǵa sý kelýine baılanysty jergilikti aýqymdaǵy 6 tótenshe jaǵdaı jarııalanǵan. Sońǵy málimetter boıynsha 13 732 adam, onyń ishinde 5 703 bala evakýatsııalandy. Kópshiligi týǵan-týystarynyń úıine ornalasty. Oblys boıynsha 13 evakýatsııalyp pýnktte 2 300 adam ornalasqan. Qazirgi ýaqytta oblysymyzǵa erigen qar sýynan keletin qaýip joq. Basty qaýip - Jaıyq ózeniniń sý deńgeıiniń kóterilýi. Sol sebepti barlyq kúsh-qural Jaıyq ózeni boıynda ornalasqan eldi mekenderdi sýdan alyp qalý úshin jumys istep jatyr», - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, Jaıyq ózeniniń jaǵasyn bıiktetý, nyǵaıtý jumystary júrgizilip jatyr.
«Jaıyq ózeniniń boıynsha 84 eldi meken ornalasqan. Sol eldi mekenderdiń turǵyndaryn aldyn ala evakýatsııalaý, qulaqtandyrý jáne úılerdi aralaý qarqyndy júrip jatyr. Qazirgi ýaqytta 9 eldi meken jol qatynasynsyz qalyp otyr», - dedi Nurjan Tóleýish.
Resmı ókildiń dereginshe, BQO-ǵa respýblıkanyń 7 óńirinen qosymsha kúsh-quraldar bólingen. Olardyń basym bóligi óńirge jetti. 6 501 maman, 683 tehnıka, 114 júzý quraly jáne 3 áýe kemesi sý tasqynymen kúreske jumyldyrylǵan.