Batyr ataǵyna usynylyp, biraq berilmegen aqmolalyq batyr Qojamseıit Shaıahmetov

<p>KÓKShETAÝ. KAZINFORM &ndash; Aqmola oblysynyń týmasy Qojamseıit Shaıahmetov sózsiz erlik kórsetken soǵysta. Batyr ataǵy berilmegen, biraq. Nege ekeni belgisiz. Kózsiz erligi, sózsiz batyrlyǵyn bireý bilse, bireý bile bermeıdi.</p>

Atbasar qalasynyń turǵyny, ólketanýshy Temirbek Qasymjanovtyń aıtýynsha, Ekinshi dúnıejúzilik soǵystyń ardageri Qojamseıit Shaıahmetov 1923 jyldyń 23 aqpanynda burynǵy Torǵaı oblysy Qıma aýdany Alǵabas aýylynda dúnıege kelgen eken. 

«1941 jyly soǵys bastalyp el basyna qaraly kún týady. Er azamattardyń barlyǵy qoldaryna qarý alyp maıdanǵa attanyp jatty. Soǵystyń naǵyz qyzǵan shaǵynda 1942 jyldyń sáýir aıynda 19 jasar jas jigit Qojamseıit Shaıahmetov ásker qataryna shaqyrylady. Stalıngrad túbindegi qandy qyrǵyndarǵa qatysady», - deıdi Temirbek Qasymjanov.

Aıtýynsha, Qojamseıit Shaıahmetov birinshi Belarýs maıdany quramynda Don, Ońtústik Batys jáne Ýkraına, Moldova, Polsha jerlerin basqynshylardan tazartý kezinde batyldyǵymen kózge túsedi. Maıdan dalasynda kórsetken erlikteri baǵalanyp «Qyzyl Juldyz», «Jaýyngerlik Qyzyl Tý», І-shi dárejeli «Otan soǵysy» ordenderimen jáne «Erligi úshin» taǵy da basqa medaldarmen marapattalady. 

Foto: T.Qasymjanovtyń jeke arhıvinen jáne Atbasar tarıhı-ólketaný mýzeıinen

1945 jyldyń kókteminde Berlın qalasy úshin bolǵan sońǵy shaıqasta kózsiz erligimen tanylady. Komandovanıe gvardııa aǵa serjanty Qojamseıit Shaıahmetovty Batyr ataǵyna usynady. Nege ekeni belgisiz bul ataq ıesine tapsyrylmaǵan. 

1947 jyly elge oralǵan Qojamseıit Shaıahmetov beıbit ómirge bel sheshe aralasady. Qalmurza (Nıkolaevka) aýylynda mal sharýashylyǵynyń órkendeýine atsalysady. Báıbishesi Bıǵaısha Jórgenbaıqyzy ekeýi toǵyz ul, úsh qyzdy tárbıelep ósirip, qutty oryndaryna qondyrady. Jerlesteri batyr dep tanyǵan maıdanger Qojamseıit Shaıahmetov 1987 jyldyń 1-shi sáýirinde ómirden ótti. 

«Jalpy, Ekinshi dúnıejúzilik soǵysta janqııarlyq erligimen tanylǵan birshama qazaq azamattarynyń Batyr ataǵyn ala almaǵany aıtylyp, jazylyp júr. Baýyrjan Momyshuly, Qasym Qaısenov sııaqty Batyrlarymyzǵa táýelsiz elimizdiń «Halyq qaharmany» ataǵy berildi. Solar sııaqty Qojamseıit Shaıahmetovke de «Halyq qaharmany» ataǵy berilse, ádildik joly osy bolar edi», - dep qosty ólketanýshy.

Aıta ketsek, budan buryn Jeńis kúni qarsańynda aqmolalyq ardagerlerge 3 mln teńgeden beriletinin jazǵan edik.