Batyldyq, meıirim, myqty rýh – Elordada qaıyrymdylyqpen aınalysatyn jandar marapattaldy
Búgingi jeńimpazdar arasynda adamdy ajaldan arashalaǵandar men qaıyrymdylyqpen aınalysyp, ulttyq qundylyqtardy nyǵaıtýǵa septigin tıgizip júrgen metsenattar da bar.
Bir ǵana bıylǵy baıqaýǵa 949 ótinim kelip tússe, 6 jyldyń ishinde 4 myńǵa jýyq ótinim tirkelgen. Kommısııa múshelerine de jeńimazdardy anyqtaý ońaıǵa soqpaǵan. Sebebi is júzinde ár qatysýshy marapatqa laıyq.
Máselen, «Týǵan jer» nomınatsııasynyń jeńimpazy, Jambyl oblysy Merke aýylynyń turǵyny Marııa Nısonova týabitti zaǵıp bolǵanyna qaramastan kóptegen adamnyń ómirine maǵyna syılaýda.
«Men aýdandyq kitaphananyń múmkindigi shekteýli jandarǵa arnalǵan bóliminde jumys isteımin. Jumysym maǵan lázzat syılaıdy. Biz Braıl shrıftin úıretemiz, telefondy sóıleý baǵdarlamalary arqyly qoldanamyz, ústel oıyndaryn oınaımyz jáne monshaqtan sómke toqımyz. Osylaısha qııalymyzben birge usaq motorıkamyz da damıdy. Bizge qajet taktıldi kitaptar tek Taraz qalasynda satylady, men olardyń Merkede de satylǵanyn qalar edim. Búgingi baıqaýdan birinshi oryn alǵanymdy estigende balasha qýandym», - deıdi Marııa Nısonova.
Marııa zaǵıp jáne nashar kóretin adamdarǵa arnalǵan kompıýterde jumys isteý, qolóner, doıby jáne shahmat oıyndaryn úıretý arqyly erekshe qajettiligi bar aýyl turǵyndaryna qoldaý kórsetedi. Sonymen birge, qaıyrymdylyq aktsııalaryn uıymdastyrady, fortepıanoda, baıanda oınaıdy. Ertegi jazyp, eresekter men balalarǵa ádebı keshter uıymdastyrady.
Baıqaýdyń «Asar» atalymynda Aqmola oblysy Qosshy qalasynan kelgen mýzykant Azamat Baqı jeńimpaz atandy. Ol Qurmanǵazy atyndaǵy konservatorııa túlegi jáne mýzykalyq aspaptarda oınap qana qoımaı, qoldan jasaýmen shuǵyldanady. Umyt bolǵan qazaq aspaptaryn zerttep, qaıta jańǵyrtýmen aınalysady. Kóptegen aspapty Qytaı men Mońǵolııadan ákelse, keıbirin ataqty mýzykanttar men ánshilerdiń urpaqtarynan satyp alǵan.
Ol 2015 jyly «Ýildek», «Tastaýyq», «Úskirik», «Qussaıraýyq», «Shyńyraý», «Qossaz», «Qosýildek» sekildi qazaqtyń úrmeli aspaptaryn jańǵyrtqan. Oǵan qosa, «Orteke» qýyrshaq teatrynyń alǵashqy onlaın baıqaýyn uıymdastyryp, teatrǵa áýen jaǵan. Qosshy qalasynyń Mádenıet úıinde Ulttyq aspaptar mýzeıin ashqan. Mýzeı qorynda 1600-ge jýyq aspap bar.
«Meıirim joly» nomınatsııasynyń jeńimpazy Vladımır Polıakovtyń da ómiri kópke ónege bolarlyqtaı. Ol ózi turatyn Pavlodar oblysy Sharbaqty aýdanyn abattandyrýǵa demeýshi bolyp, kómek qolyn sozyp keledi. Aýyldyń jas mamandary úshin baspana salyp, ortalyq saıabaǵyn qalpyna keltirgen. V. Polıakovtyń qoldaýymen kıim aýystyratyn jyly bólmeleri bar hokkeı korty, jasandy jabyny bar fýtbol alańqaıy, balalarǵa buqaralyq sport túrlerimen aınalysatyn birneshe oıyn alańy salynǵan. Bul isterdi atqarýǵa keıipkerimiz 20 mıllıon teńge jumsaǵan.
Sonymen birge, Vladımır Polıakov kóptegen muqtaj otbasylarǵa turaqty túrde materıaldyq kómek kórsetip keledi.
«Batyl júrek» nomınatsııasynda 6 balany órtten aman alyp shyqqan shymkenttik Marına Gafarova marapattaldy. Marınanyń ózi de kópbalaly ana. Ol tún ishinde kórshisiniń úıi órtenip jatqanyn baıqap, dereý órt sóndirýshilerdi shaqyrǵan. Ózi de kómekke umtylyp, úıdiń terezesin syndyryp, otqa oranǵan úıden kámlete jasqa tolmaǵan alty balany alyp shyqqan. «Qaıyrymdylyq kerýeni» sahnasynda erjúrek áıelge qurmet kórsetildi.
Sońǵy «Qaıyrymdylyq tarıhy» atalymynda Almaty turǵyny Aleksandr Tsoı úzdik dep tanyldy. Bloger, mýzykant jáne qoǵam qaıratkeri A. Tsoı áleýmettik jelidegi paraqshasynda qaıyrymdylyq jobalaryn jasap, muqtaj jandarǵa kómek kórsetýdi uıymdastyrady. 2020-2021 jyldary Aleksandrdyń uıytqy bolýymen 21 balaǵa bıonıkalyq protez tartý etildi. Sońǵy 3 jylda tirek-qımyl apparaty aýrýlary bar taǵy 22 balaǵa ınnovatsııalyq, tıimdiligi joǵary qural – ekzoskelet alynǵan.
Saltanatty keshte І, ІІ jáne ІІІ oryn júldelerimen 24 adam marapattaldy. Olarǵa dıplomdar men medaldar tabys etildi. Qaıyrymdylyqpen aınalysatyn taǵy 11 adamǵa yntalandyrý syılyǵy berildi. Barlyq jeńimpazdarǵa turmystyq tehnıka satyp alýǵa sertıfıkattar berilgen.