Batalon komandıri oǵash qylyq kórsetti degen qyzmetkerdiń shaǵymy rastalmady – mınıstrlik

NUR-SULTAN. QazAqparat - Qorǵanys mınıstriniń tapsyrmasyna sáıkes qurylǵan arnaıy komıssııa kelisimshart boıynsha áskerı qyzmetshi A.B. Elshibaevanyń Qarýly kúshter qatarynan zańsyz shyǵarylýy jáne batalon komandıri tarapynan oǵan oǵash qylyq kórsetýi týraly áleýmettik jelide jarııalanǵan jazbaǵa qatysty qosymsha tekserýdi aıaqtady.

Qorǵanys mınıstrliginiń komıssııasy azamatsha A.B. Elshibaevanyń aıtqan tujyrymy men aıǵaqtaryn qaıtadan muqııat zerdeledi. Komıssııanyń jan-jaqty tekserisiniń nátıjesinde A.B. Elshibaevanyń aryzynda kórsetilgen faktiler qujatpen rastalmaǵanyn jáne shyndyqqa janaspaıtynyn anyqtady, dep habarlaıdy QazAqparat QO Qorǵanys mınıstrliginiń baspasóz qyzmetine silteme jasap.

Buǵan deıin, 2022 jyldyń 6 mamyrynda Qonaev garnızonynyń Áskerı polıtsııa bólimi atalǵan áskerı qyzmetshiniń jazbasha ótinishi boıynsha tekserý jumystaryn júrgizgen. Batalonnyń barlyq jeke quramy A.B. Elshibaevaǵa qatysty 54179 áskerı bóliminiń laýazymdy tulǵalary tarapynan zańsyz is-áreket faktileriniń bolǵanyn rastamady.

Jańa komıssııa jumysynyń nátıjeleri jáne Qonaev garnızonynyń Áskerı polıtsııa bólimi jınaǵan materıaldardy qaraý, sondaı-aq 54179 áskerı bólimi qyzmetshileriniń túsindirmelerin taldaý boıynsha azamatsha A.B.Elshibaeva usynǵan aıyptaýlar rastalmady.

Aıta ketý kerek, burynǵy áskerı qyzmetshi qyzmet atqarý barysynda batalon qolbasshylyǵy tarapynan birneshe márte eskertý alǵan jáne áskerı bólimniń aýmaǵyna uıaly telefondy zańsyz alyp kirgeni úshin tártiptik jaýapqa tartylǵan bolatyn.

Bıylǵy jyldyń 3 mamyrynda attestattaý komıssııasynyń sheshimine sáıkes A.B. Elshibaeva jaýyngerlik daıarlyq baǵdarlamasyn tómen meńgergeni jáne tártipti buzǵany úshin QR Qarýly kúshteri qatarynan teris pıǵyly boıynsha shyǵaryldy.

«Sonymen qatar Qazaqstan Respýblıkasynyń qoldanystaǵy zańyna sáıkes A.B. Elshibaeva attestattaý komıssııasynyń qorytyndysymen kelispegen jaǵdaıda sot organdaryna júginýge quqyly ekenin habarlaımyz»,-delingen QR Qorǵanys mınıstrliginiń baspasóz qyzmetiniń habarlamasynda.