Basty róldi áıeli somdap, óz pesasyn qoıatyn teatr dırektorlary da bar - A.Muhamedıuly
Bul týraly búgin QR Parlamenti Májilisindegi Úkimet saǵatynda QR Mádenıet jáne sport mınıstri Arystanbek Muhamedıuly aıtty.
«Qazirgi ýaqytta bizde 9 óńirlik teatrda bas rejısser jetispeıdi. Sonymen qatar bas rejısserdiń laýazymyn kásibı bilimi joq adamdar atqarǵany jaıynda da derekter bar. Qazirgi ýaqytta Mádenıet jáne sport mınıstrligi 2 naqty júıe usynyp otyr. Ár teatrda klassıkalyq turǵydan dırektor bolýy kerek. Ekinshiden, kórkemdik jetekshi bolýy tıis. Mundaı saıasat búkil dúnıe júzinde bar», - dedi ol.
Mınıstrdiń atap ótýinshe, teatrlardyń basym bóliginde, ıaǵnı 70 paıyzynda dırektordyń qoıylymdary sahnalanýda. Al mundaı olqylyqtarǵa jol bermeý qajet.
«Dırektor bolǵan soń óz pesasyn satyp alady. Sodan keıin aqsha tabý úshin ózi rejısser bolady. Basty rólde súıikti jary jáne ózi de oınaıdy», - dedi A.Muhamedıuly.