Basty másele memlekettigimizdi saqtap qalý boldy – Erlan Qarın qańtar oqıǵasy jaıly

ASTANA. QazAqparat – Memlekettik keńesshi Erlan Qarın óziniń Telegram arnasynda osydan bir jyl buryn bolǵan qasiretti qańtar oqıǵasy týraly jazba jarııalady, dep habarlaıdy QazAqparat tilshisi.

«Osydan bir jyl buryn qaıǵyly qańtar oqıǵasy boldy. Sol kúnderi teris kúshter beıbit sherýlerdi paıdalanyp, jappaı tártipsizdikter uıymdastyryp, memlekettik tóńkeris jasaýǵa tyrysty. Olardyń basty maqsaty - júrgizilip jatqan jańashyldyqtarǵa tosqaýyl bolyp, eski tártipterdi saqtap qalý edi.

Sol sátte elimizdiń haos pen anarhııaǵa túsý qaýpi tóndi. Ár mınýt mańyzdy edi. Bul ýaqytta basty másele memlekettigimizdi saqtap qalý boldy. Azamattardyń birligi men Prezıdenttiń sheshýshi áreketiniń arqasynda memlekettik tóńkeris bolmady. Biz úlken apatty boldyrmaı, jaǵdaıdy turaqtandyra aldyq», - dep jazdy Erlan Qarın.

Sonymen qosa, ol qańtar oqıǵasynan keıin elimizdegi lıberalızatsııa men demokratııaǵa baǵyttalǵan qozǵalys damı túskenin atap ótti.

«Mundaı daǵdarystardy bastap ótkergen memleketterdiń bıligi ádette jaǵdaıdy jabyq ustaýǵa, saıası júıeni myǵymdaýǵa nemese qatań tártip engizýge tyrysady. Bul oraıda, elimizdegi lıberalızatsııa men demokratııaǵa baǵyttalǵan qozǵalys toqtap qalmady, kerisinshe ol údeı tústi.

Prezıdenttiń bastamasymen elimizde qarqyndy jáne jan-jaqty jańǵyrtý protsesi bastaldy. Memleket basshysynyń strategııalyq baǵyty qoǵamnyń qoldaýyna ıe boldy. Muny Konstıtýtsııalyq referendým men kezekten tys Prezıdent saılaýynyń nátıjeleri dáleldeıdi.

Endi bizdiń aldymyzda qoǵam birligin saqtaı otyryp, josparlanǵan reformalar legin tolyq júzege asyrý mindeti tur», - dep málim etti Memlekettik keńesshi.

Foto: ABDUAZIZ MADYAROV/AFP