Basty maqsat – qazaq boksshylaryn Olımpıadanyń jeńis tuǵyrynan kórsetý – Myrzaǵalı Aıtjanov
Osy oraıda, bokstan Qazaqstan ulttyq quramasynyń bas bapkeri Myrzaǵalı Aıtjanovpen aldaǵy jarystarǵa josparlary men oqý-jattyǵý jıyndaryn qalaı ótkizip jatqany jaıynda shaǵyn suhbat alǵan edik.
– Myrzaǵalı Qulanuly, qazaq boksshylary jańa jyldan keıin jańa maýsymǵa qalaı, qaıda daıyndalyp jatyr?
– 5 qańtardan beri qaraı tolyq quramda Almaty oblysyndaǵy «Aqbulaq» Olımpıadalyq ortalyǵynda oqý-jattyǵý jıynyn ótkizip jatyrmyz. Jalpy oqý-jattyǵý jıynymyz eki kezeńnen turady. Birinshisi kezeńi – dene daıyndyǵymen jumys isteý, ekinshisi arnaıy fızıkalyq daıyndyq bolyp sanalady. Josparlanǵan eki oqý-jattyǵý jıynyn da osynda ótkizemiz. Ekinshi kezeńde Iran, Ázerbaıjan boksshylarymen birlesken oqý-jattyǵý ótkizemiz.
– Alda Italııanyń Mılan qalasynda ótetin lıtsenzııalyq týrnır jaqyndap qaldy. Ulttyq quramadan atalǵan elge kimderdi aparýdy josparlap otyrsyz?
– Ózderińiz bilesizder, 13-19 qarasha aralyǵynda Astanada bokstan Qazaqstan spartakıadasy ótken bolatyn. Biz lıtsenzııalyq týrnırlerge osy dodanyń jeńimpazdary men júldegerlerin negizge ala otyryp aparamyz. Tek alty boksshy ǵana barady. Bizde asa aýyr salmaqta jalǵyz Qamshybek Qońqabaev qana Olımpıadaǵa joldama alyp qoıdy. Qalǵan alty salmaqtaǵy boksshylarymyzǵa lıtsenzııa aýadaı qajet ekeni aıtpasaq ta túsinikti. Biraq oqý-jattyǵý jıyndarymyz aıaqtalmaı jatyp, Italııaǵa kimderdiń baratynyn naqty aıta almaımyz.
– Aldaǵy lıtsenzııalyq týrnırlerge Qońqabaev qatyspaıdy ǵoı...
– Árıne, qatyspaıdy. Ol Olımpıadaǵa deıin arnaıy jattyǵady. Qaıda, qalaı jattyǵatynyn josparlap jatyrmyz.
– Mılanda qansha joldama jeńip alýdy kózdep otyrsyzdar?
– Barlyǵyn ýaqyt, rıng kórsetedi. Birden qalǵan alty lıtsenzııanyń bárin jeńip alamyz dep ýáde berýden aýlaqpyz. Biz talasatyn salmaqta joldama ala almaı qalǵan álemniń qanshama myqty boksshylary bar. Olardyń da armany bizben birdeı – qarsylasyn utyp, joldamaǵa qol jetkizý. Qazir boksta básekelestik asa joǵary. Sol úshin Mılanǵa asa joǵary deńgeıdegi daıyndyqpen barýdy kózdep otyrmyz.
– Mılanda joly bolmaǵan boksshylar taǵy qandaı jarystarda Olımpıada joldamasyna talasýǵa múmkindikteri bar?
– Osy jyly birinshi lıtsenzııa taratatyn jarys Italııada ótse, ekinshisi Taılandta ótedi. Birinshisinde – 49, al ekinshisinde 51 lıtsenzııa oınatylady dep josparlanyp otyr. Meniń qazirgi basty maqsatym – atalǵan qos lıtsenzııalyq týrnırge asa joǵary deńgeıde daıyndalyp, qalǵan alty salmaqtaǵy joldamany jeńip alý. Joldama qolǵa tússe, Parıjde Tokıoda ketken eseni qaıtaryp, qazaq boksshylaryn Olımpıadanyń jeńis tuǵyrynan kórsetý.
– Áńgimeńizge raqmet!