Bastaýysh synyptarǵa beriletin tegin tamaqtyń sapasy tómendep ketken – palata

ASTANA. QazAqparat – Elorda mektepterindegi bastaýysh synyptarǵa memleket esebinen tegin beriletin tamaqtyń mázir quny 30 paıyz ósedi. Osylaısha 2023 jyldyń 1 qańtarynan bastap bastaýysh synyptaǵy bir oqýshynyń kún saıyn tamaqtanýyna qazirgi 449,5 teńgeniń ornyna 581 teńge bólinedi, dep habarlaıdy QazAqparat tilshisi.

Bul týraly Astana kásipkerleriniń quqyqtaryn qorǵaý jónindegi keńestiń kezekti otyrysynda málim boldy.

Astana qalasy kásipkerler palatasynyń dırektory Beısen Jolboldıevtiń sózine qaraǵanda, keıingi 3-4 jyldyń ishinde bir balaǵa 449 teńge qarastyrylǵan.

«Qarasańyz tamaq baǵasy jylyna birneshe ret qymbattap jatyr. Bizde mektepterge tamaqtandyrý qyzmetin usynatyn kásiporyndardyń qaýymdastyqtary bar. Olardyń aıtýynsha, búgingi tańda bir balaǵa shaqqandaǵy tamaqtandyrý qarajaty keminde 1000 teńge bolý kerek. Bul máseleni biz kótergen kezde 1 qarashadan bastap 600 teńgege, odan keıin 2023 jyldyń 1 qańtarynan bastap 1000 teńgege kóterý kerek edi. Bizge sondaı ýáde berilgen. Biraq qazir 449 teńge sol qalpy qalyp otyr. Bul kásipkerler quqyǵyna ǵana qatysty másele emes. Tamaqtandyrý tıisti deńgeıde bolmasa, balalardyń fızıologııalyq damýyna zııan kelýi múmkin. Mektep ashanasyndaǵy as mázirin qaıta qaraý kerek. Qazir mázirlerdiń sapasy tómendep ketken. Memlekettiń bir balaǵa dep bóletin aqshasy jetpegendikten kásipkerler únemdeýge kóshedi. Olar ózderin shyǵynǵa batyryp jumys istemeıdi ǵoı. Olar bul iske paıda tabý úshin baryp otyr», - dedi palata ókili.

Qalalyq bilim basqarmasy basshysynyń orynbasary Rımma Imanǵazınova jańa jyldan bastap bastaýysh synyptardy tamaqtandyrýǵa bıýdjetten bólinetin qarjy kóbeıetinin jetkizdi.

Biraq onyń bir balaǵa shaqqandaǵy quny kásipkerler talap etip otyrǵan mejeden áldeqaıda tómen bolmaq.

«Mektepte tamaqtandyrý qyzmetin kórsetetindermen tamyz aıynan beri birneshe ret kezdestik. Onyń ishinde tamaq sapasy týraly da, baǵasy týraly da másele qaralǵan. №598 buıryqqa ózgerister engizilgen. Ol ózgeristerdi birneshe márte qaradyq. Negizinen 107, 108 pýnkterge qatysty suraqtar týyndaǵan. Iá, biz bir balaǵa bólinetin qarjy kólemin ulǵaıtý kerektigin aıtqanbyz. Biraq bıýdjet aqyny kóterýdi qoldaı almady. Endi tamaqtandyrý qunyn 2023 jyldyń qańtarynan bastap 30 paıyz kóterý josparlanyp otyr. Qazir bir balany tamaqtandyrýǵa kún saıyn 449 teńge 50 tıyn bólinse, qańtardan bastap 584 teńge bolady. Bul - ortasha baǵa. Óńirlerdegi baǵany qaradyq. Eń úlken baǵa 600 teńgeniń aınalasynda bolyp shyqty», - dedi basqarma bastyǵy Rımma Imanǵazınova.