«Bastaý bıznes» jappaı kásipkerlikti damytýdyń mańyzdy quralyna aınaldy – Nursultan Nazarbaev
«Barshańyzǵa málim, shaǵyn jáne orta bıznesti jan-jaqty qoldaý — memlekettik saıasattyń basym baǵyttarynyń biri. Sol úshin biz tıisti zańnamany jetildirip, salyq aýyrtpalyǵyn azaıttyq, ákimshilik rásimderdi qysqartyp, kredıttik resýrstarǵa qoljetimdilikti arttyrdyq. Sonyń arqasynda elimizde shaǵyn jáne orta kásipkerlik sýbektileri jyl sanap artyp, ekonomıkanyń osy sektorynda eńbek etetin azamattar kóbeıdi. Qazirgi tańda shaǵyn jáne orta bıznes salasynda jumys isteıtin adamdardyń sany 4 mıllıonǵa, al onyń jalpy ishki ónimdegi úlesin 35 paıyzǵa jetkizý úshin biraz sharýa atqarylyp jatyr. Bul mindet «Nur Otan» partııasynyń «Ózgerister joly: ár azamatqa laıyqty ómir» atty baǵdarlamasynda naqty kórinis tapty», - dep atap ótedi QR Tuńǵysh Prezıdenti.
Nursultan Nazarbaev 2016 jyly elimizde jappaı kásipkerlikti damytý jóninde bastama kótergenin eske salyp ótedi.
«Búginde bul bastama osy maqsatqa qol jetkizýdiń mańyzdy quralyna aınalyp otyr. Onda aýyl-aımaqtar men shaǵyn qalalarda óz isin bastaǵan kásipkerlerdi qoldaýǵa erekshe kóńil bólý keregi aıtylǵan. Bastamanyń taǵy bir negizgi baǵyty – jańadan kásip ashqan bıznesmenderdi qoldaý sharalaryn qarjylyq saýattylyqqa oqytý júıesin engizý edi. Sóıtip, «Atameken» Ulttyq kásipkerler palatasy «Bastaý bıznes» jobasyn qolǵa aldy. Ol nátıjeli jumyspen qamtý jáne jappaı kásipkerlikti damytýǵa arnalǵan «Eńbek» baǵdarlamasynyń mańyzdy bóligine aınaldy.