«Bastaý bıznes» sertıfıkatyn beremiz»: Jambyl oblysynda alaıaqtardyń habarlamasy taraýda

TARAZ. QazAqparat – Jambyl oblysynyń turǵyndary emtıhandardy tapsyrýǵa, bıznes-jospar qurýǵa, sondaı-aq «Bastaý Bıznes» baǵdarlamasy boıynsha oqýdy támamdaǵany týraly sertıfıkat alýǵa kómektese alatyn kompanııa týraly jappaı habarlama alýda, dep habarlaıdy QazAqparat tilshisi.

Taraǵan habarlamada kompanııanyń 3 jyl boıy osyndaı qyzmettermen aınalysyp kele jatqandyǵy aıtylǵan.

«Sizderdi «Bastaý Bıznes» baǵdarlamasy boıynsha oqýǵa túsýlerińizben quttyqtaımyz! Eger siz belgili bir sebeptermen «Atameken», «Bastaý Bıznes» oqýyn oqı almaıtyn bolsańyz, biz kómektesemiz. Biz jeke kompanııa qyzmetin usynamyz, úsh jyl boıy «Bastaý Bıznespen» oqytyp, sertıfıkattaryn berip kelemiz. Sizdiń ornyńyzǵa sabaq oqyp, ekzamender tapsyryp, bıznes plan jasaımyz. Kýrsty tolyq bitirgen týraly sertıfıkat alyp beremiz. Oryndar shekteýli, tezirek tapsyrys berińiz», - dep jazylǵan messendjerlerde taraǵan aqparatta.

Osyǵan baılanysty, Jambyl oblysynyń Kásipkerler palatasy «Eńbek» Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan memlekettik baǵdarlamasy sheńberindegi «Bastaý Bıznes» jobasy boıynsha kásipkerlik negizderine oqytýdyń barlyq qyzmetteri tegin negizde júzege asyrylatynyn habarlady.

«Osyndaı alaıaqtyq sıpattaǵy habarlamalardy jappaı jibermeýdi jáne bógde adamdardyń qyzmetterin paıdalanbaýdy suraımyz! Oqytý barysynda jobaǵa qatysýshylardy tek joba keńesshisi jáne ár toptyń bıznes-treneri súıemeldeıtinin eske salamyz. Joǵaryda atap ótken habarlama boıynsha aqparat «Atameken» UKP qaýipsizdik qyzmetine jiberildi. Eger siz osyndaı jaǵdaıǵa tap bolsańyz, sizge sertıfıkat alýǵa nemese «Bastaý Bıznes» baǵdarlamasy boıynsha oqýǵa baılanysty óz qyzmetterin aqsha nemese syıaqy úshin usynatyn beıtanys adamdardan qońyraýlar kelip tússe, áreket etpeýińizdi jáne birden Jambyl oblysynyń Kásipkerler palatasyna júginýińizdi suraımyz», - dep habarlady óńirlik kásipkerlik palatasynyń baspasóz qyzmeti.