Bastapqy jarnasyz da baspana alýǵa bolady - QIK
Ol úshin bastapqy jarnanyń ornyna ózine nemese úshinshi tulǵaǵa tıesili jyljymaıtyn múlikti kepilge qoıý jetkilikti.
Bul týraly «Qazaqstan ıpotekalyq kompanııasy» IU» AQ Basqarma tóraǵasy Ádil Muhamedjanov Ortalyq kommýnıkatsııalar qyzmetinde ótken baspasóz máslıhatynda málim etti.
«Ipotekalyq nesıeleýdi yntalandyrý maqsatynda QR úkimeti qazan aıynda «Nurly jer» baǵdarlamasyna túzetýler engizdi. Ózgeristerge sáıkes, baspana qunynyń 30 paıyzyn quraıtyn bastapqy jarnaǵa balama paıda boldy. ıAǵnı, 30 paıyz jarnany tóleı almaıtyn azamattar ózine nemese úshinshi tulǵaǵa tıesili jyljymaıtyn múlikti kepil retinde usyna alady. Sondaı-aq, qurylys kompanııalaryna aldyn ala tólegen tólemi de esepke alynady. Ol da bastapqy jarna retinde eskeriledi»,- dedi Muhamedjanov.
Basqarma tóraǵasynyń málimdeýinshe, engizilgen ózgerister arqyly bastapqy turǵyn úı uǵymy keńeıtilgen. Endi páterlerdi tek qurylys kompanııalarynan ǵana emes, basqa da zańdy tulǵalardan (saýda kompanııalary) satyp alýǵa bolady.
Sonymen birge, bankterdiń qaryzdy sýbsıdııalaý týraly ótinishti qarastyrý merzimi burynǵy alty kúnnen úsh kúnge deıin qysqartylǵan.
Aıta keteıik, jyl basynan beri «Nurly jer» baǵdarlamasy boıynsha ıpotekalyq qaryzdardy sýbsıdııalaýǵa 12,3 mlrd teńge bolatyn 1209 ótinim kelip túsken jáne onyń barlyǵy derlik (1180 ótinim) maquldanǵan. Kelesi jyly baǵdarlama arqyly 105 mlrd teńge somasyna 7 myń adam ıpotekalyq qaryz alýǵa ótinim bere alady.
Ekinshi deńgeıli bankter de Baǵdarlamaǵa qatysýǵa qyzyǵýshylyq tanyta bastady. Búginde «Bank TsentrKredıt» AQ, «Sberbank» AQ EB, «Bank VTB» AQ, «ATF Bank» AQ, «Nurbank» AQ jáne «Turǵyn úı qurylys jınaq banki» AQ (jeke turǵyn úı qurylysyn damytý) qaryz berip jatyr. Jyl sońyna deıin bul qatarǵa «Tsesna Bank» AQ qosylýy múmkin. Al kelesi jyly «Qazaqstan Halyq Banki» AQ, «Forte Bank» AQ, «Bank Kassa Nova» AQ , «Tengri Bank» AQ, «AsiaCredit Bank (AzııaKredıt Bank)» AQ, «Qazaq Banki» AQ Baǵdarlamaǵa qatysýdy josparlap otyr.