​​Bastapqy jarna 0%: Jeńildetilgen lızıngpen alǵashqy agrotehnıka berildi

QOSTANAI. QazAqparat - Jeńildetilgen lızıng baǵdarlamasymen alǵashqy aýyl sharýashylyǵy tehnıkasyn Qostanaı oblysynyń fermerleri aldy, dep habarlaıdy QazAqparat.

Qazaqstanda jasalǵan aýyl sharýashylyǵy tehnıkasyn jeńildikpen lızıngke berý baǵdarlamasyna ótinim qabyldaý bıylǵy 5 tamyzda bastalǵan bolatyn. Baǵdarlamany iske asyrý úshin shamamen 1 myń dana traktor, kombaın jáne ózge de tehnıkany satyp alýǵa 40 mlrd teńge bólindi.

Baǵdarlamanyń sharttary:

• lızıng merzimi – 10 jylǵa deıin;

• syıaqy mólsherlemesi – jyldyq 6%;

• lızıng boıynsha bastapqy jarna – 0%;

• negizgi qaryzdy qaıtarý boıynsha jeńildikti kezeń – 1 jyl.

Baǵdarlamanyń tıimdi sharttary otandyq tehnıkaǵa úlken suranys týdyrdy. Búgingi tańda 15,4 mlrd somasyna aýyl sharýashylyǵy taýar óndirýshilerinen 202 ótinim tústi.

«Bul óte jaqsy baǵdarlama, sharttary yńǵaıly, bastapqy tólemsiz berý fermerler úshin úlken kómek. Osy baǵdarlamanyń arqasynda sıpattamasy jaǵynan jaqsy «Kırovets» jańa traktoryn satyp alý múmkindigine ıe boldyq», — dedi «Maıbasov Z.M» sharýa qojalyǵynyń ókili.