Bastalǵan barys jyly Qazaqstan úshin este qalatyn tarıhı jyl bolmaq - Q. Toqaev
Jıyndy ashyp sóz sóılegen palata Tóraǵasy Qasym-Jomart Toqaev bıylǵy jyly da elimizde mańyzdy sharalar oryn alatynyn, barys jyly erekshe este qalatynyn atap ótti, dep habarlaıdy QazAqparat.
Palata jumysyn ashý barysynda Tóraǵa byltyrǵy jyly elimizde atqarylǵan aýqymdy sharalarǵa toqtaldy. «Byltyr Elbasynyń «Daǵdarystan - jańarý men damýǵa» atty Joldaýyna baılanysty ulttyq ekonomıkamyzdyń básekege qabilettiligin arttyrý men halyqtyń áleýmettik jaǵdaıyn odan ári jaqsartýǵa baılanysty qolǵa alynǵan naqty tapsyrmalar boıynsha kóptegen jumystar atqaryldy. Ótken jyly Parlament 121 zań qabyldady. Al aǵymdaǵy jyly da bizdiń aldymyzda óte aýqymdy ári mańyzdy maqsattar tur», dedi Q. Toqaev.
Sonymen birge óz sózinde Tóraǵa aǵymdaǵy jyly júzege asa bastaǵan EQYU-ǵa elimizdiń tóraǵaly etýindegi mańyzdylyqty, Kedendik odaqtyń júzege asýyndaǵy erekshelikterdi atap ótti. Budan basqa el ishinde oryn alatyn basty damý baǵyttar men erekshe sharalarǵa da toqtaldy. «Bıyldan bastap ekonomıkamyzdy jedel ındýstrııalandyrýdyń besjyldyq josparyn oryndaýǵa kirisip otyrmyz. Bul ıgi bastamanyń elimizdiń áleýeti men múmkindigin odan ári qaryshty órkendetýge tyń serpin bereri sózsiz. 2010 jyly Ata zańymyz - Qazaqstan Konstıtýtsııasynyń qabyldanǵanyna 15 jyl tolady. Bul merekeni Parlamenttiń zań shyǵarý qyzmeti de tolaıym tabystarmen qarsy alady dep senemin. Taǵy bir aıtýly mereke - bıyl ekinshi dúnıejúzilik soǵystaǵy Uly Jeńistiń 65 jyldyǵy. Qazaqstandyqtar úshin saıası mańyzy zor bul merekeni atap ótýde soǵys jáne eńbek ardagerlerine laıyqty qyzmet kórsetilip, olardyń áleýmettik jaǵdaıyn jaqsartýǵa belsendilik tanytýǵa shaqyramyn. Jalpy, bastalǵan barys jyly este qalatyn tarıhı jyl bolmaq. Sondyqtan da qol jetkizilgen jetistikterimizdi eselep, elimizdiń jańa bıikterge kóterilýi jolynda qarqyndy qyzmet atqaramyz dep oılaımyn», dedi Q. Toqaev.