Baspasóz kartasy ne úshin kerek – mınıstrlik jaýaby

ASTANA. QazAqparat – Aqparat jáne qoǵamdyq damý vıtse-mınıstri Qanat Ysqaqov «Mass-medıa» týraly jańa zań jobasy aıasynda engiziletin baspasóz kartasy (press-karta) engizýdiń sebebin túsindirip berdi, dep habarlaıdy QazAqparat tilshisi.

«Zań jobasyndaǵy jańashyldyqtardyń biri - baspasóz kartasy (press-karta) engizý. Bul boıynsha qarsylyq, túsinispeýshilik týyndady, múmkin túsindirý jumystary azdyq etken shyǵar. Baspasóz kartasyn engizý jýrnalısterdiń aqparat alýyna jáne taratýyna eshqandaı kedergi keltirmeıdi. Kerisinshe, karta - BAQ ókilderiniń jumysyn yntalandyryp, ońtaılandyrýǵa baǵyttalǵan qujat», - dedi Qanat Ysqaqov Májiliste «Mass-medıa» týraly zań jobasyn talqylaý barysynda.

Vıtse-mınıstrdiń málimdeýinshe, baspasóz kartasyn almaǵan BAQ ókili jumysyn jalǵastyra beredi.

«Baspasóz kartasyn alý mindetti emes. Ol tilshilerdiń jumysyn shektemeıdi, tyıym salmaıdy. Karta engizý - BAQ ókilderin akkredıtteý, olardyń is-sharalarǵa qatysýy, memlekettik organdardyń ǵımaratyna kirý protsesin jeńildetetin qujat. Taǵy bir jaıt, baspasóz kartasyn bizdiń mınıstrlik bermeıdi, ony úkimettik emes uıym beredi», - deıdi ol.

Aıta keteıik, bıyl elimizde jýrnalısterdiń quqyǵy men bostandyǵy týraly ulttyq baıandama ázirlenbek.

Buǵan deıin BAQ jáne tilshilerdi sotqa berý merzimi 3 jylǵa deıin qysqaratyny týraly habarlaǵan edik.