Baspanasyzdardyń úmiti - «Nurly jer»

ASTANA. QazAqparat - Ár adam óziniń jeke baspanasy bolǵandyǵyn armandaıdy. Elimizdegi qoldanystaǵy júıe qomaqty qarjyny, bastapqy jarna tóleýdi talap etedi. Al olardyń paıyzy ekinshi deńgeıli bankterde ártúrli, biraq kem degende on bes paıyzdan bastalady. Ortasha tabysty elimizdiń azamaty ondaı somany tóleýge qaýqarsyz. Osynyń saldarynan kóptegen problemalar týyndaıdy. Buǵan qosa, elimizde baspanamen qamtylmaǵan áleýmettik jaǵynan osal toptar bar ekendigin de umytpaý kerek. Baspana alýda esh deldalsyz, nesıe tómen paıyzben berilgen bolsa, biraz adamdardyń turmystyq hali men deńgeıi kóterilip, bolashaqqa degen senimi arta túser edi.

Árıne bul máseleni sheshýde Úkimet eshbir qadam jasamady desek, ótirik aıtqan bolar edik. «Óńirlerdi damytý», «2012-2020 jyldarǵa arnalǵan monoqalalardy damytý», «2011-2020 jyldarǵa arnalǵan turǵyn úı-kommýnaldyq sharýashylyǵyn jańǵyrtý», «Qoljetimdi baspana-2020», sonymen birge "Báıterek" Holdınginiń quramyna kiretin "Qazaqstan turǵyn úı qurylys jınaq banki" AQ Bank salymshylaryn 2022 jylǵa deıin qoljetimdi baspanamen qamtamasyz etetin "Óz úıim" atty daǵdarysqa qarsy biregeı baǵdarlamasy - bunyń barlyǵy qazaqstandyq azamattardyń turǵyn úı máselelerin sheshýge arnalǵan memlekettik baǵdarlamalar. 

Deı tura, turǵyndardy baspanamen qamtý maqsatynda kórsetilgendeı birneshe baǵdarlamalar jasalyp, iske asyrylǵanymen bul másele óz ózektiligin áli de joıǵan joq. Sol sebepti halyqty turǵyn úımen odan ári qamtamasyz etý úshin qoldanystaǵy baǵdarlamalardaǵy turǵyn úı máseleleriniń barlyǵyn bir baǵdarlamaǵa biriktire otyryp, biryńǵaı «Nurly Jer» turǵyn úı qurylysy baǵdarlamasy ázirlendi.  «Nurly jer» baǵdarlamasynyń basty nazary turǵyn úı qurylysyn memleket qarajaty esebinen tikeleı qarjylandyrýdan birqatar mindetterdi sheshý arqyly jeke bastamalardy yntalandyrýǵa aýysatyn bolady

QR Ulttyq ekonomıka mınıstri Qýandyq Bıshimbaevtyń aıtýynsha, «Nurly jer» memlekettik baǵdarlamasy naqty úsh baǵytta iske asatyn bolady. Birinshiden, ekinshi deńgeıli bankter esebinen ıpoteka arqyly jańa baspanany satyp alý sharalaryna basymdyq beriledi. Ekinshiden, turǵyn-úı jınaq júıesi boıynsha halyqty baspanamen qamtamasyz etý jumysy odan ármen jalǵasa beredi. Úshinshiden, jeke turǵyn úı qurylysyn barynsha damytýǵa basa nazar aýdarylady. Sondaı-aq, baǵdarlama aıasynda halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úıdiń óńirlik qoryn qurý, qajetti ınfraqurylym júrgizý arqyly jeke turǵyn úı qurylysyn damytý qolǵa alynady.

«Nurly jer» baǵdarlamasy turǵyn úı qurylysyn damytýǵa, otandyq kásiporyndardyń qurylys qýatyn paıdalanýǵa mańyzdy serpin beredi dep kútýlýde. Ony júzege asyrýdyń nátıjesinde 1,5 mln. sharshy metr turǵyn úı salynyp, onyń ishinde 2017-2019 jyldary 274 myń sharshy metr turǵyn úı salý josparlanyp otyr.

Baǵdarlama júzege asqan ýaqytta elimizdegi aldaǵy eki jylda 100 myńnan astam jer telimi el ıgiligine berilmek. Jol tóselip, jylý, jaryq tartylǵan sol jer ýchaskilerine jeke úı salýǵa bolady. Bastysy - «Nurly jer» baǵdarlamasy aıasynda ıpotekalyq  nesıeniń paıyzy eki esege deıin arzandaıdy. Biraq budan bulaı jaldamaly páter, nesıege beriletin baspanany memleket emes,  jeke qurylys kompanııalary salatyn bolady.

Búgingi tańda statıstıkalyq málimetterge súıensek, tek  iri qalalarda ǵana emes, aýyl men aýdandarda da baspanaǵa muqtaj jandardyń sany jeterlik. Olardyń endigi úmiti «Nurly jer» baǵdarlamasynda ekendigi belgili.