Baspanasyz almatylyq álemdi sharlaǵan jıhankezge aınaldy

ASTANA. QazAqparat - 22 jastaǵy almatylyq Sergeı Bondarenko jetkilikti qarajatsyz eń qajetti dúnıelerin ǵana alyp jaıaý dúnıejúzin aralap shyǵýdy maqsat etken. Onyń bul áreketin bireýler hosh kórip járdem kórsetse, bireýler kerisinshe senimsizdik tanytqan. Alaıda baspanasyz qalsa da qıynshylyqqa qasqaıa qarsy turǵan jas jigit taǵdyrdyń synaǵynyń jaqsy tustary bar degen toqtamǵa kelip otyr.

Sergeı Bondarenko Almatyda ony ustap turatyn eshteńe joq dep sheship, jaıaý jer júzin aralap ketken. Saıahattyń bastalǵanyna eki jarym jyl ótti, al jigit 90 myń shaqyrymdy artqa tastap 18 memleketke baryp qaıtqan.

Ár elde onyń esinde qalǵan túrli oqıǵalar bolypty. Ol aldaǵy eki jyl kóleminde saıahatyn AQSh-ta aıaqtaýdy josparlap otyr. Osy aralyqta Afrıka, Ońtústik jáne Soltústik Amerıkany sharlap qaıtpaq. Jaqynda ol Ázerbaıjannyń astanasy Baký qalasyna jetti.

«QazAqparat» HAA-nyń menshikti tilshisi Bekbaý Taımanov jıhankezben jolyǵyp, onyń qaıdan kele jatqanyn, qaıda bet alǵanyn jáne josparlaryn surap bildi. Ol Ázerbaıjanǵa Túrkııadan kelgen, Nahıchevanǵa jetkesin Bakýge ushyp shyqqan. «Túrkııada 3 aıdaı ýaqyt Afrıkaǵa ótip ketpek bolyp árekettendim. Alaıda jolym bolmady. Qazir kún sýytty, sondyqtan ońtústikke bet alamyn, Úndistanǵa baratyn shyǵarmyn. Sol jaqtan Iran nemese Pákistanǵa ketemin, ary qaraı Afrıkaǵa jetýdiń joldaryn qarastyramyn», - dedi Sergeı Bondarenko.

Afrıkada saıahatshy Mozambık eline ǵana barmaqshy, onyń oıynsha bul qurlyqta tek osy memleket qana barynsha qaýipsiz. Eki jyl merzimde ol Qyrǵyz, Tájikstan, Ózbekstan, Reseı, Mońǵolııa, Ázerbaıjan, Grýzııa, Túrkııa, Ýkraına, Moldova, Belarýs, Qytaı, Laos, Kambodja men Taıland, Malaızııa men Shrı-Lankada bolǵan.

Sergeı Bondarenko Ońtústik Amerıkada Argentına, Bolıvııa, Kolýmbııa, Ekvadorǵa barmaqshy oıy bar.

Sergeıdiń aıtýynsha, onyń basty maqsaty - adamdar qonystanǵan barlyq qurlyqtardy aralap qaıtý. Jolaı ol óz elin jarnamalaı júredi, óıtkeni arqa qorjynynda Qazaqstannyń týy ilinip turady. Adamdar osyǵan qarap saıahatshynyń qaıdan kele jatqanyn bilgisi keledi eken. Aralaǵan elderiniń arasynda ony Qytaı men Túrkııada jyly qarsy alypty. «Túrikter Qazaqstan azamattaryn jylyushyraı qarsy alady. Men Qazaqstannan ekenimdi aıtqanda olar «qardash» ıaǵnı baýyrym dep yqylasyn bildiredi», - deıdi Sergeı.

Sergeıdiń devızi: «Around the world without money» (Aqshasyz Jerdli aınalyp shyǵý).

«Saparymdy AQSh-ta aıaqtaýdy oılap júrmin. Qalǵanyn keıinirek kóre jatarmyz. Joljazba kitap jazamyn. Almatyda tanysym bar, ol maǵan kitabymdy shyǵarýǵa kómektesetindigin aıtyp ýáde bergen», - deıdi Sergeı.

Sonymen qatar saıahatshy Túrkııada bolǵan kezine toqtala ketti. «Ol kezde Túrkııada áskerı tóńkeris boldy, arqamda úlken rıýkzagym bolǵandyqtan meni jıi toqtatyp, teksere berdi. Sol kezde Qazaqstan elshiliginen kómek suradym, elshi Janseıit Túımebaev (qazir OQO ákimi - avtor) meni Qazaqstannyń azamaty ári saıahatshy degen hat jazyp berdi. Osy hat sol elde maǵan kedergilerdi eńserýge septigi tıdi», deıdi jıhankez jerlesimiz.