Baspanasy qulap qalǵan keıbir aqtóbelikter daıyn úı satyp alýǵa ótinish berdi
Sý tasqyny kezinde Temir aýdanynyń Shubarqudyq, Qumsaı, Eńbekshi jáne Shıtúbek aýyldaryndaǵy 91 úı men kásipkerlik nysandaryna, keıbiriniń aýlasyna sý kirdi. Qazirgi kezde tórt aýyl boıynsha 29 otbasy daıyn úı satyp alýǵa kelisim berip otyr. Al 21 otbasy úı salyp berýge ótinish bildirdi. Sonymen birge bul aýdanda 40 úıge jóndeý jumystary júrgiziledi. Aqtóbe oblysynyń ákimi Ashat Shaharov Temir aýdany Sarkól aýyldyq okrýginiń Qumsaı aýylyna bardy. Munda sý basqan úılerdi, áleýmettik nysandardy aralady.
«Sýǵa ketken úılerdi qarap shyqtym. Burynǵy ornyna qaıta salý múmkin emes. Sondyqtan anyqtalǵan jer ýchaskelerine tabıǵı apattan zardap shekkenderge turǵyn úıler boı kóteredi. Aýylda qalmaımyn deıtin jandar bolsa, daıyn páterlerdi satyp alyp beremiz. Al árbir adamnyń eńbegimen tapqan dúnıe-múlkine Úkimet bólek tólem ázirledi. Ony komıssııa anyqtaıdy. Qazir mamandar oblys boıynsha áli de jumys istep jatyr. Memleket basshysy aıtqandaı, eshkim de kómeksiz qalmaıdy, barlyq qoldaý kórsetiledi. Bastysy aýyzbirshilik kerek, sonda ǵana eńbek ónimdi bolady», - dedi Ashat Shaharov.
Temir aýdany Qumsaı aýylynda endi qorǵanys bógeti salynady. Uzyndyǵy 2,7 shaqyrymdyq bóget salý úshin jobalyq-smetalyq qujat ázirlengen. Qazirgi kezde saraptamadan ótkizilip jatyr. Sonymen birge osy komıssııaǵa aýyldyń 3 turǵyny qosylady.
Aıta keteıik, Temir aýdany boıynsha 39 otbasyǵa 14 mln teńgeden astam bir rettik áleýmettik kómek berildi. Sondaı-aq Qumsaı negizgi mektebiniń 9 oqýshysy «Baldáýren-Túrkistan» oqý saýyqtyrý ortalyǵy Shymkent qalasyna jiberildi. Al aýdan boıynsha tótenshe jaǵdaılar nátıjesinde keltirilgen zııandy baǵalaý jónindegi komısııaǵa 91 ótinish túsken, onyń 15-ine 84 mln 217 teńge qarjy tólendi. Barlyǵy 27 bas mal óleksesiniń shyǵyny 8,5 mln tg boldy. Al 369 myń teńgelik birjolǵy tólem aýdandaǵy 82 otbasyǵa aýdaryldy.