Baspanamen qamtý 2030 jylǵa qaraı ár turǵynǵa 30 sharshy metrge jetýi kerek - Elbasy Joldaýy

ASTANA. QazAqparat - QR Prezıdentiniń búgin jarııalanǵan Qazaqstan halqyna arnalǵan dástúrli Joldaýynda baspana máselesi de qamtylǵan. Atap aıtqanda, Memleket basshysy sońǵy jyldary júzege asyrylyp jatqan baǵdarlamalar arqasynda Qazaqstanda paıdalanýǵa berilgen turǵyn úılerdiń kólemi jylyna 10 mıllıon sharshy metrden asqanyn atap ótedi.

«Turǵyn úıdi kópshilikke qoljetimdi etken turǵyn úı jınaqtaý júıesi tıimdi jumys isteýde.  Baspanamen qamtý kórsetkishi sońǵy 10 jylda bir turǵynǵa shaqqanda 30 protsentke ósip, búginde 21,6 sharshy metrdi qurady. Bul kórsetkishti 2030 jyly 30 sharshy metrge deıin jetkizý kerek. Osy mindetti oryndaý barysynda qurylys salýdyń jańa ádisterin, zamanaýı materıaldardy, sondaı-aq ǵımarattardyń jobasy men qala qurylysynyń josparyn jasaǵanda múlde basqa tásilderdi qoldaný kerek», delingen Elbasy Joldaýynda.

Budan bólek, Prezıdent ǵımarattardyń sapasyna, ekologııalyq tazalyǵyna jáne energııalyq tıimdiligine joǵary talap qoıý máselesin alǵa tartady.

«Salynatyn jáne salynǵan úıler men ınfraqurylymdyq nysandardy ıntellektýaldy basqarý júıelerimen jabdyqtaý kerek. Bul turǵyndarǵa qolaıly jaǵdaı jasap, elektr energııasyn, jylýmen sýdy tutynýdy qysqartyp, tabıǵı monopolısterdi tıimdi jumysqa yntalandyrady. Zańnamaǵa, sonyń ishinde tabıǵı monopolııalar salasyn retteıtin zańdarǵa tıisti ózgerister engizý qajet. Ákimder turǵyn úı-kommýnaldyq ınfraqurylymyn jetildirý máselesin memleket-jekemenshik seriktestigi negizinde belsendi sheshýi kerek. Aýyldyq eldi mekenderdi sapaly aýyzsýmen qamtamasyz etý úshin Úkimet bul iske barlyq qarajat kózderinen jyl saıyn kem degende 100 mıllıard teńge qarastyrýy qajet» delingen Joldaýda.