Baspanaǵa muqtaj búkil azamattar ortalyqtandyrylǵan esepke alynady

NUR-SULTAN. QazAqparat – Turǵyn úı saıasatynyń jańa tujyrymdamasy boıynsha baspanaǵa muqtaj azamattardyń ortalyqtandyrylǵan esebi jasalady. Bul jaıynda QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda málim etti, dep habarlaıdy QazAqparat tilshisi.

«Memleket basshysynyń tapsyrmasy aıasynda turǵyn úı saıasatyn reformalaý máselesi boıynsha zań jobasy ázirlendi. Atalǵan zań jobasy búgingi tańda Parlament Májilisiniń qaraýynda. Onyń sheńberinde turǵyn úı saıasatyn tutastaı reformalaý jáne ony ekinshi deńgeıdegi bankter júıesinen shyǵara otyryp, «Otbasy bankin» ulttyq damý ınstıtýty etip qaıta qurý usynylady. Sondaı-aq, «Otbasy bankiniń» bazasynda «turǵyn úımen qamtamasyz etý ortalyǵyn» qurý josparlanǵan. Ol sanattarǵa tıesiligine qaramastan, respýblıka aýmaǵynda turǵyn úıi joq búkil muqtajdardy ortalyqtandyrylǵan esepke alatyn bolady. Usynylyp otyrǵan jańa modelde turǵyn úı jaǵdaıyn jaqsartý jónindegi memlekettik qoldaý sharalary esepke qoıý kúnine, tabystyń bar-joǵyna jáne berilgen ótinimge baılanysty júzege asyrylady», - dedi mınıstr.

Aıtýynsha, bul jańashyldyqtar halyqty turǵyn úımen qamtamasyz etýdiń tıimdiligin arttyrýǵa, azamattardyń turǵyn úı alý rásimin ońtaılandyrýǵa, sondaı-aq azamattardyń barlyq sanattary arasynda turǵyn úıdi ádil bólýdiń biryńǵaı tetigin engizýge múmkindik bermek.

Aıta keteıik, Úkimet otyrysynda Premer-Mınıstr arendalyq turǵyn úıdi satyp alýdaǵy zańnama qaıshylyǵyn sheshýdi tapsyrdy.