Baspana jaldaý aqysyn sýbsıdııalaý: Ótinishter Baspana market portalynda qabyldanbaq
Otbasy bank qazaqstandyqtardyń turǵyn úıdi jaldaý aqysyn sýbsıdııalaýǵa qatysty onlaın ótinimderin qabyldaý úshin platformanyń fýnktsıonaldyǵyn pysyqtaýda. Jumys barysyn avtomattandyrý úshin bank 6 memlekettik organnyń 16 derekqorymen ıntegratsııa jasaýy qajet. Sondyqtan baspanany jalǵa alý aqysyn sýbsıdııalaý baǵdarlamasy 2022 jyldyń mamyr aıynan bastap iske qosylady.
Kóp balaly otbasylar, 1 jáne 2 toptaǵy múgedekter, jetim balalar, múmkindigi shekteýli balalardy tárbıelep otyrǵan otbasylar jaldaý aqysyn sýbsıdııalaýǵa ótinish tapsyra alady. Alaıda úmitkerler turǵyn úı alý kezeginde turýlary qajet.
Olardyń árbir otbasy múshesine shaqqanda sońǵy 6 aıdaǵy jıyntyq tabysy eń tómengi kúnkóris deńgeıiniń bir mólsherinen aspaýy tıis (2022 j. 1 KM – 36 018 teńge).
Mundaı otbasylarǵa kómek retinde bıýdjetten 50 mıllıard teńge bólinedi. Bul qarajatqa memleket 70 myń qazaqstandyqtyń baspanany jalǵa alý qunynyń jartysyn sýbsıdııalaıdy.
«Bul tizimdegilerdiń deni, 51 myńǵa jýyǵy, kóp balaly otbasylar. Taǵy 10 myńy - 1 jáne 2 toptaǵy múgedek jandar, 7 myńy - múmkindigi shekteýli balalar tárbıelep otyrǵan az qamtylǵan otbasylar, 2 myńy - jetim balalar. Endi bul azamattar úshin baspana máselesi asa ótkir bolmaıdy. Olar atalmysh baǵdarlama arqyly otbasylyq bıýdjetke túsetin salmaqty azaıtýǵa múmkindik alady. Únemdelgen qarajatty turmysty jaqsartýǵa baǵyttaýǵa bolady nemese jeńildetilgen nesıe berý baǵdarlamalaryna qatysý úshin qarajat jınaqtaýǵa da múmkindik bar», - dep túsindirdi «Otbasy bank» AQ Basqarma tóraıymy Lázzat Ibragımova.
Baǵdarlamaǵa qatysatyn azamattardyń tizimin Indýstrııa jáne ınfraqurylymdyq damý mınıstrligi qalyptastyrady. Ony alǵannan keıin Otbasy Bank atalmysh baǵyttyń operatory retinde jaldaý aqysyn sýbsıdııalaý múmkindigi týraly tizimdegi azamattardy habarlandyrady. Іzinshe úmitker bank fılıalyna kelmeı-aq, Baspana market platformasy arqyly onlaın ótinish bere alady.
Ol úshin qazaqstandyqtardyń ETsQ kilti bolýy qajet. Ótinish berýshiniń kirisi platformada tekserilgennen keıin ol ózine qolaıly baspana taýyp, ony jalǵa alý shartyna onlaın qol qoıyp, tirkeıdi. Sodan keıin aǵymdaǵy shot ashyp, jalǵa alý qunynyń 50 paıyzyn sol jerge aýdarady. Bank óz tarapynan qalǵan 50 paıyzyn aýdaryp, jalǵa alýshynyń tólem tártibin odan ári qadaǵalaıdy.
Úmitkerdiń jaldaý aqysyn sýbsıdııalaýǵa onlaın ótinish berý múmkindigi bolmasa, ol bul jumysty Otbasy bankiniń bólimshesinde óz-ózine qyzmet kórsetý aımaǵynda iske asyra alady.
Eske salsaq, jaldaý aqysy mynadaı tártippen sýbsıdııalanbaq:- 50 % memlekettik sýbsıdııalar esebinen jabylady;
- qalǵan 50 % alýshy óz betinshe tóleıdi. Sonymen qatar Turǵyn úı jaldaý sýbsıdııasynyń bir bóligi jergilikti bıýdjetten tólenedi.