Baspana saýdasy báseńdep qaldy
Vedomstvonyń dereketerine qaraǵanda, bıylǵy qazanda turǵyn úıdi satyp alý-satý boıynsha tirkelgen mámileler sany 34 336 quraǵan, onyń ishinde jeke úıler boıynsha - 7 980, páterler boıynsha 26 356 qujat rásimdelgen. Bul sandardy qyrkúıektegi málimettermen salystyrǵanda (36 241) turǵyn úıdi satyp alý-satý mámileleriniń 3,8%-ǵa kemigenin kórýge bolady.
«Mámileler sany boıynsha burynǵydaı Almaty (7 133 nemese jalpy sannan 20,7%) men Astana (5 670 nemese jalpy sannan 16,5%) qalalary kósh bastap tur. Alyp satýdyń eń az sany Ulytaý oblysynda – 322 (jalpy kólemnen 0,9%).
Qyrkúıek aıymen salystyrǵanda eń kóp ósim qazan aıynda Almaty qalasynda (12,5%), Batys Qazaqstan (9,3%) jáne Qostanaı oblystarynda (7,1%) tirkeldi. Bir aıdaǵy eń úlken tómendeý Qyzylorda (-36,7%) men Túrkistan (-17,2%) oblystarynda boldy», - dep jazdy Ulttyq statıstıka bıýrosynan.
2022 jyldyń qyrkúıek aıymen salystyrǵanda kóppáterli úılerdegi alyp-satý kelisimderiniń sany 980-ge azaıdy. Degenmen, jeke úılerge qaraǵanda páterlerge suranys kóp, qazan aıynda barlyǵy 26 356 páter satyldy, bul - mámilelerdiń jalpy sanynyń 76,8%-y. Bir bólmeli páterler qatarynan úshinshi aı suranysta qalyp otyr. Qazan aıynda bir bólmeli 10 515 páter resimdelge, saýdanyń negizgi úlesi Almaty jáne Astana qalalaryna (jıyntyq úlesi – 55,4%) tıesili, 2 bólmeli páter boıynsha 9 294 mámile jasaldy.
«Qyrkúıekpen salystyrǵanda jeke turǵyn úıler boıynsha mámileleriniń sany Soltústik Qazaqstan oblysy (+5) men Qostanaı (+50) oblystarynda ǵana ósti, qalǵan barlyq óńirde tómendeý baıqalady. 2021 jylǵy qazanmen salystyrǵanda mámileler sany 22,8% -ǵa azaıdy. Eń úlken tómendeý Shyǵys Qazaqstan oblysynda baıqaldy (-56,1%), teris kórsetkish Almaty qalasynan ózge barlyq óńirde tirkeldi, Almaty shaharynda mámileler sany ótken jyldyń qazan aıymen salystyrǵanda, kerisinshe, 9,1%-ǵa ósken», - delingen habarlamada.