Baspana kezegine turatyndardyń sońǵy 10 jyl eshqandaı úı-jaıy bolmaýy kerek – Qanat Sharlapaev

<p>Baspana kezeginde turǵandarǵa turǵyn úı esepke turǵan kúnine jáne tabys deńgeıine baılanysty beriledi. Bul týraly Májilistiń jalpy otyrysynda &laquo;Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly&raquo; zań jobasyn talqylaý kezinde Ónerkásip jáne qurylys mınıstri Qanat Sharlapaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Zań jobasy aıasynda «Otbasy banki» aktsıonerlik qoǵamy ulttyq damý ınstıtýty bolyp qaıta qurylady. Oǵan azamattardy esepke qoıý men turǵyn úı bólý jónindegi jergilikti atqarýshy organdardyń fýnktsııalary beriledi.

«Otbasy bankine» atalǵan fýnktsııalardy berýdi eskere otyryp, ony ekinshi deńgeıli bankter júıesinen shyǵarý eskerilgen. Sáıkesinshe, «Otbasy bank» banktik jáne basqa da operatsııalardy tıisti lıtsenzııasyz júzege asyrady», — dedi Q. Sharlapaev.

Bul rette, Qarjy naryǵyn retteý jáne damytý jónindegi agenttigi jáne Ulttyq Bank «Otbasy bankine» qatysty mynadaı qadaǵalaý fýnktsııalaryn saqtaıdy:

— qarjylyq qyzmet tutynýshylarynyń quqyqtaryn qorǵaý;
— valıýtalyq retteý ári baqylaý, qarjylyq jáne ózge de eseptilikti alý;
— qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyldy júzege asyrý;
— aqsha-kredıt statıstıkasyn jáne qarjy naryǵynyń statıstıkasyn qalyptastyrý úshin eseptilik derekterin jınaý;
— býhgalterlik esep máseleleri boıynsha normatıvtik quqyqtyq aktilerdi qabyldaý jáne taǵy basqa.

«Otbasy bankin ekinshi deńgeıdegi bankter júıesinen shyǵarý qoldanystaǵy zańnamaǵa sáıkes ony depozıtterge kepildik berý júıesinen shyǵarýǵa ákeledi. Osyǵan baılanysty, Otbasy bankinde ornalastyrylǵan azamattardyń salymdaryna memleketpen kepildik berý usynylyp otyr. Jańa mehanızmderge sáıkes, jergilikti atqarýshy organdardaǵy bólek tizimder Otbasy bankine ózgerissiz beriledi. Bul turǵyda jergilikti atqarýshy organdardyń bazasyna esepke qoıý toqtatylady. Otbasy banki bazasynda Turǵyn úımen qamtamasyz etý ortalyǵy qurylady, oǵan qandaı da bir sanatqa jatatyndyǵyna qaramastan turǵyn úıge muqtaj barlyq azamattar tura alady. Árbir ótinim úshin kiristerdi, múlik pen aktıvterdi anyqtaıtyn otbasynyń tsıfrlyq portreti jasalady. Bul óz kezeginde azamattyń otbasylyq jaǵdaıynyń barlyq sıpattamalaryn anyqtaýǵa múmkindik beredi», — deıdi mınıstr.

Onyń sózine qaraǵanda, Turǵyn úımen qamtamasyz etý ortalyǵy memlekettik derekqorlarmen ıntegratsııalanǵan biryńǵaı aqparattyq baza bolady. Osy ortalyqty qurý «bir tereze» qaǵıdatyn paıdalanýǵa múmkindik beredi.

Bul qaǵıdat turǵyn úıge muqtajyn rastaý, kezekke turý, odan keıin ıpoteka alý úshin bankke barý sııaqty birneshe ınstantsııaǵa júginýdiń qajetin joıady.

Buǵan qosa, usynylyp otyrǵan jańa modelge sáıkes, turǵyn úıdi bólý azamattardyń esepke turǵan kúnine jáne tabys deńgeıine baılanysty júzege asyrylady.

Osylaısha, turǵyn úıdi esepke turǵan kúnine baılanysty bólý barlyq muqtaj azamattardy ádil túrde qamtýǵa múmkindik beredi.

«Sonymen qatar, tabys deńgeıine baılanysty azamattardyń jaldaý aqysyn sýbsıdııalaý, jalǵa beriletin turǵyn úı nemese jeńildetilgen ıpotekalyq qaryzdar (jyldyq mólsherlemeniń 2-5% mólsherinde) túrinde memlekettik qoldaý sharalary kórsetiledi. Buǵan qosa, azamattardy turǵyn úı kezegine qoıý kezinde negizgi talaptardyń biri olardyń menshiginde baspana bolmaýy kerek. Qazir qoldanystaǵy zańnamaǵa sáıkes kezekke turý úshin sońǵy 5 jyl ishinde turǵyn úıi bolmaýy qajet. Muqtaj azamattardy turǵyn úımen qamtamasyz etýdiń jańa tásilderine baılanysty, kezekke jańadan turatyn azamattar úshin osy merzimdi 10 jylǵa deıin ulǵaıtý kózdelgen», — dedi Q. Sharlapev.