Baspana kezeginde bazaǵa qaıta engizýge jol berilmeıdi – Qaıyrbek Óskenbaev

NUR-SULTAN. QazAqparat – Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev baspana kezegin retteý isinde ashyqtyq qalaı qamtamasyz etiletinin aıtty, dep habarlaıdy QazAqparat tilshisi.

«Búgingi tańda Turǵyn úı qurylys jınaq banki «Otbasy banki» bolyp qaıta quryldy jáne onyń bazasynda «Turǵyn úımen qamtamasyz etý ortalyǵy» jasaqtaldy. Osy ortalyq, turǵyn úıge muqtajdardyń esebin júrgizýdi, sondaı-aq turǵyn úıdi bólýdi turǵyn úıdiń qoljetimdilik satysyna sáıkes, tizimge engizilgen kúni boıynsha kezekte turǵandar arasynda bir ortalyqtan júzege asyratyn bolady», - dedi mınıstrdiń birinshi orynbasary.

Vıtse-mınıstrdiń sózine qaraǵanda «Turǵyn úımen qamtamasyz etý ortalyǵy» jeke tulǵalardyń memlekettik derekqorlaryn bir ortaǵa toǵystyrý arqyly «barmaq basty, kóz qysty» áreketterdiń jolyn kesetin bolady.

«Bazaǵa qaıta engizýge jol berilmeıdi. Azamattar memlekettik baǵdarlamalarǵa bir ret qana qatysa alady», - dedi Qaıyrbek Óskenbaev.

Buǵan deıin habarlaǵanymyzdaı, «Nurly jer» baǵdarlamasy boıynsha salynatyn páter sany kóbeıetin boldy.

Onyń aıtýynsha, táýelsizdik jyldarynda 1,6 mıllıonnan astam qazaqstandyq jańa baspanaǵa ıe bolǵan.