Baspana kezegi: Bastapqy jarna 10 paıyzǵa deıin tómendetilýi múmkin

NUR-SULTAN. QazAqparat – Ákimdikte kezekte turǵan azamattar úshin bastapqy jarna nesıe somasynan 10 paıyzǵa deıin tómendetilmek. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Búgingi kúni Turǵyn úı qurylys jınaq bankindegi salymshylardyń sany 1,4 mln adam boldy nemese 440,3 mlrd teńge qarajat jınaǵan 460 myń otbasyna jetti. Shamamen, 160 myń salymshy ákimdikte kezekte turǵan adamdar», - dedi mınıstr B. Atamqulov Parlament Májilisinde «Nurly jer» baǵdarlamasynyń júzege asyrylýyna arnalǵan Úkimet saǵatynda.

Sonymen qatar, vedomstvo basshysy jergilikti atqarýshy organdarda baspana kezeginde turǵandardyń bastapqy jarnasyn tómendetý máselesi pysyqtalyp jatqanyn jetkizdi.

«Turǵyn úıdiń qoljetimdiligin arttyrý maqsatynda ákimdikte kezekte turǵan azamattar úshin bastapqy jarnany kredıt somasynan 10 paıyzǵa deıin tómendetý qarastyrylýda», - dep atap ótti mınıstr.