Basqa óńirlerge qaraǵanda Ulytaý oblysynda medbıkelerdiń jalaqysy 5% kem kóterilgen

ASTANA. QazAqparat - Ulytaý oblysyna jumys saparymen barǵan QR Premer-Mınıstri Álıhan Smaıylov Sátbaev qalasyndaǵy Ortalyq aýrýhana qyzmetkerlerimen kezdesti. Onda medbıkelerdiń biri kishi qyzmetkerleriniń jalaqysyn kóterý máselesin qozǵady, dep habarlaıdy QR Úkimetiniń baspasóz qyzmeti.

Sátbaev qalasyndaǵy Ortalyq aýrýhana qyzmetkerlerimen kezdesý barysynda
Premer-Mınıstr 2020 jyldan 2023 jylǵa deıin dárigerler jalaqysy jyl saıyn 30%-ǵa, al orta býyn medıtsına mamandarynyń jalaqysy 20%-ǵa ulǵaıtylǵanyn eske saldy. Sonymen qatar 2022 jyldan 2025 jylǵa deıin jyl saıyn densaýlyq saqtaý salasynyń qalǵan qyzmetkerleriniń jalaqysyn 20%-ǵa arttyrý týraly sheshim qabyldandy.

Alaıda Ulytaý oblysynda kishi býyn medıtsına qyzmetkerleriniń jalaqysy tek 15%-ǵa kóterilgeni anyqtaldy.«Bul durys emes, jyl saıyn 20%-ǵa kóterý týraly sheshim qabyldandy, osylaısha, tórt jyl ishinde jalaqyny shamamen eki ese ósirý kózdelgen. Ákimdikpen bul máseleni shesheıik», — dedi Úkimet basshysy.