Basqa qalaǵa kóshkende kóliktiń nómirin aýystyrý mindetti me

NUR-SULTAN. QazAqparat – Bir qaladan ekinshi qalaǵa qonys aýdarýshylardyń kólik salyǵy boıynsha týyndaıtyn máselege memlekettik nómirdiń qatysy joq. Memlekettik kirister komıtetiniń óndiristik emes tólemderdi ákimshilendirý basqarmasy basshysynyń orynbasary Oljas Otar osyndaı málimet berdi, dep habarlaıdy QazAqparat.

Ortalyq kommýnkatsııalar qyzmetinde ótken brıfıngide BAQ ókilderi tarapynan mekenjaıyn aýystyrǵan kólik ıelerine qatysty saýal qoıyldy.

«Salyq tóleýshi bir qaladan ekinshi qalaǵa aýysqan jaǵdaıda turǵylyqty mekenjaıy ózgerse, ol kisilerdiń esebi sol salyq tóleýshi tirkeýge turǵan kezde avtomatty túrde aýysady. Biraq keıbir jaǵdaılar kezdesip jatady. Paraqsha esebi qazirgi turyp jatqan mekenjaıǵa aýysqan jaǵdaıdyń ózinde de ol kisiler burynǵy jerge salyq tóleýi kezdesedi. Ondaı kezde salyq qyzmetkerleri túzetý engizip, salyqty jańa mekenjaı boıynsha jiberedi. Bul kóbinese eski mekenjaıy boıynsha salyq tóleıtin adamdarǵa baılanysty týyndaıtyn másele», - deıdi Oljas Otar.

Vedomstvo ókili mekenjaı aýysqan kezde týyndaıtyn salyq máseleleriniń memlekettik nómirdi aýystyrýǵa qatysy joq ekenin de eskertti.

«Salyqty jańa kóship kelgen qalada tóleý úshin kóliktiń memlekettik nómirin aýystyrý mindetti emes. Bul kisilerdiń kólikteriniń salyǵy turǵylyqty mekenjaıy boıynsha esepteledi. ıAǵnı memlekettik nómirdi aýystyrýdyń qajettigi týyndamaıdy», - komıtet ókili.