Bashqurtstanda qylmystyq ómirdi nasıhattaıtyn saıttardyń jumysyna tyıym salyndy

NUR-SULTAN. Bashinform - QazAqparat – Bashqurtstannyń Dıýrtıýlın aýdanaralyq sotyna prokýror talap-aryz túsirdi. Qadaǵalaý organynyń ókili onda memleket pen qoǵamnyń jáne belgisiz adamdar tobynyń Reseı aýmaǵynda aqparattyń taratylýyna tyıym salý týraly múddesin qorǵaıdy.

Bashqurtstannyń bashinform.ru saıtynyń sottyń baspasóz qyzmetine silteme jasap habarlaýynsha, ınternetke monıtorıng júrgizý barysynda jastardy qoǵamǵa qarsy áreketter men qylmysqa ıtermeleıtin saıttar anyqtalǵan. Atalmysh saıttar sonymen qatar jastar arasynda urylardyń zańdary men buzaqylardyń ómir-saltyn nasıhattaıtyny, qylmystyq áreketterdi shytyrman, qyzyqqa toly ómir retinde kórsetip, qoǵamda qarym-qatynastardyń kim kúshti ádildik sonyń jaǵynda degen túsinikti qalyptastyrýǵa yqpal etetini aıtylǵan.

Bul saıttar bárine birdeı qoljetimdi, ashyq, oǵan kirý úshin aldyn ala tirkelip, qupııa sózdi engizýdiń de qajeti joq. Kez kelgen ınternet qoldanýshy saıttaǵy aqparattarmen tanysyp, ondaǵy materıaldardy elektrondy túrde kóshirip ala alady. Saıttaǵy materıaldardy kóshirý men taratýǵa eshqandaı kedergi joq.

Tekserý barysynda atalǵan aqparattar ornalastyrylǵan saıttar biryńǵaı reestirde joq bolyp shyqty.

Sot mundaı aqparattardyń Reseı aımaǵynda taratylýyna tyıym salynǵanyn eskerte otyryp, prokýrordyń talabyn qanaǵattandyrdy. Jelidegi saıttardyń ataýlary Roskomnadzor mekemesiniń reestrine engizildi.