Básekelestikti qorǵaý jáne damytý agenttigi 193 gaz quıý stantsııasyn tekserip jatyr

NUR-SULTAN. QazAqparat - Memleket basshysynyń aǵymdaǵy jylǵy 5 qańtardaǵy tapsyrmasy boıynsha Básekelestikti qorǵaý jáne damytý agenttigi 193 bólshek avtomobılge gaz quıý stantsııasyna qatysty tergep-tekserip jatyr, onyń 89-y Bas prokýratýramen birlesip júrgizilýde. Bul týraly QazAqparat atalmysh vedomostvonyń resmı saıtyna silteme jasap habarlaıdy.

Bas prokýratýranyń tekserýi sheńberinde Agenttik 44 naryq sýbektisiniń áreketterinde kelisilgen áreket jáne karteldik sóz baılasýdy uıymdastyrý faktilerin anyqtady.

Sondaı-aq qazirgi kezde prokýratýra organdarynyń usynystary negizinde Aqmola, Qyzylorda jáne Qostanaı oblystary men Shymkent qalasy boıynsha aýmaqtyq monopolııaǵa qarsy departamentter 32 naryq sýbektisine qatysty ákimshilik is qozǵady, materıaldar sotqa jiberildi.

Soltústik Qazaqstan oblysy men Nur-Sultan boıynsha aýmaqtyq monopolııaǵa qarsy departamentter 7 naryq sýbektisi boıynsha materıaldardy qylmystyq quqyq buzýshylyq belgilerin qaraý úshin Ekonomıkalyq tergeý departamentine jiberdi.

Atyraý oblysynda 2 naryq sýbektisi boıynsha taıaý arada ákimshilik ister qozǵalatyn bolady.

Sonymen qatar, prokýratýra organdarynan qadaǵalaý aktileri kelip túsken jaǵdaıda, basqa tergep-tekserýler boıynsha ákimshilik ister qozǵalady.

Qalǵan naryq sýbektileri boıynsha básekelestikti qorǵaý salasyndaǵy zańnamany buzýshylyq belgilerin anyqtaý boıynsha jumys jalǵasyp jatyr.