«Básekelestikti qorǵaý agenttiginde qazaq tiliniń báseke qabileti shektelgeni qalaı?» - respýblıkalyq basylymdarǵa sholý
***
Keshe Premer-Mınıstrdiń birinshi orynbasary Serik Ahmetovtiń, Prezıdent Ákimshiligi, ortalyq jáne óńirlik memlekettik organdar ókilderiniń, Parlament depýtattarynyń qatysýymen Indýstrııa jáne jańa tehnologııalar mınıstrliginiń (IJTM) keńeıtilgen alqa otyrysy bolyp ótti. Onda IJTM-niń 2011 jylǵy jumysynyń qorytyndysy jáne Elbasynyń Qazaqstan halqyna arnaǵan Joldaýyn is júzine asyrý maqsatyndaǵy 2012 jylǵa arnalǵan mindetter týraly máseleler qaraldy. Osyǵan oraı «Egemen Qazaqstan» gazetinde «Baǵdarlama damýǵa qarqyn berdi» degen taqyryppen maqala jarııalandy. Basylymnyń atap ótýinshe, alqa otyrysyn qorytyndylaǵan Premer-Mınıstrdiń birinshi orynbasary Serik Ahmetov Elbasynyń bıylǵy Joldaýynan týyndaıtyn mindetterge baılanysty mınıstrlikke jáne onyń qurylymdyq vedomstvolaryna naqty tapsyrmalar berip, 2012 jyly atqarylatyn keshendi jospardy saralady.
Mysyrdaǵy Port-Saıd qalasynda oryn alǵan tártipsizdikterdiń saldary óte aýyr bolyp otyr. Bul bassyzdyq áreketterdi tipti qasiretke aparǵan qadam deýge de bolatyndaı. 74 adamnyń qaza tabýy, 1 myńdaı adamnyń jaralanýy osylaı deýge májbúrleıdi. Oqıǵa bylaı bolǵan. Egıpettiń Port-Saıd qalasynda jergilikti «Ál-Masrı» jáne Kaırdiń «Ál-Ahlı» komandalarynyń arasynda el chempıonatynyń kezekti týryna oraı kezdesý ótip jatady. 3:1 esebimen jergilikti komanda jeńý ústinde eken. Bir kezde olardyń fanattary alańǵa júgirip shyǵyp, kaırlyq klýbtyń oıynshylaryna tarpa bas salady. Buǵan el astanasy jankúıerleriniń jergilikti komanda men fanattaryn qorlap, til tıgizetin sózder jazylǵan bannerlerdi jaıyp salýy sebep bolǵan syńaıly. Stadıonnyń qaýipsizdik qyzmetine fanattar boı bermeı ketken. Keıbir málimetter polıtsııanyń stadıonnan ádeıi shyǵaryp jiberilgenin aıtady. Bul jaıynda «Egemen Qazaqstan» gazetiniń búgingi sanyndaǵy «Bassyzdyqtyń aıaǵy qashanda qasiret» degen taqyryptaǵy maqalada keńinen baıandalǵan.
***
«Aıqyn» gazetiniń búgingi sanynda ekonomıka ǵylymdarynyń doktory, professor Rahman Alshanovtyń «Qarjy mınıstrligi kimdi aldap júr?» degen taqyryppen kólemdi maqalasy jarııalandy. Ǵalymnyń atap ótýinshe, 2010 jyly munaı óndirisiniń kólemi 4 paıyzǵa ósti, al munaı baǵasy 29 paıyzǵa bir-aq kóterildi. Bul degenimiz, baǵalardyń ósýin esepke alǵanda bıýdjet túsimi 34 paıyzǵa, al 2011 jyly tipti 40 paıyzǵa deıin ósýi tıis degendi bildiredi. Biraq ózdiginen kelgen bul ósimde Qarjy mınıstrliginiń eshqandaı eleýli úlesi joq. Kerisinshe, Respýblıkalyq bıýdjettiń oryndalýyn baqylaý jónindegi Sanaq komıteti men quqyq qorǵaý organdarynyń esepteri qarjylyq zań buzýshylyqtardyń jyl ótken saıyn kóbeıip kele jatqanyn aıǵaqtaıdy. «Salyq organdary neshe túrli qaptaǵan esepterimen «bıznesti» úreıde ustap otyr, óz jumysynyń basym bóligin bıznesti tekserýmen ótkizip, kóp jaǵdaıda bıznestiń durys jumys isteýine kedergi bolýda. Bul jerde taǵy da jumysqa kelgende eń aldymen býhgalterlik-eseptik kózqarastyń beleń alatyny baıqalady», - dep jazady ol maqalasynda.
Dúnıejúzilik boks serııasy (WSB) dodasynda baq synap júrgen «Astana arlandary» bıylǵy maýsymnyń bastapqy básekeleriniń birinde «Mılan Týnders» klýbynan 0:5 esebimen oısyraı utylǵan bolatyn. Italııada ótken osy kezdesýde jýan judyryqty jigitterimizdiń jigersizdik tanytqanyna sol kezde barsha qazaqstandyq jankúıerler kúıingen edi. Appenın túbeginiń túlekteri kúni keshe Alataý baýraıyna at basyn tiredi. Búgin olar Almatydaǵy Balýan Sholaq atyndaǵy sport saraıynda «Astana arlandarymen» qaıta qolǵap túıistiredi. Ótken básekede oısyraı utylýymyz kezdeısoq jaǵdaı ekenin osy joly jerlesterimiz «taıǵa tańba basqandaı» etip dáleldeýge tıis. Bul jaıynda «Aıqyn» gazetindegi «Arlandar ese qaıtarýy tıis» degen maqalada egjeı-tegjeıli baıandalǵan.
***
«Burynǵy Mádenıet mınıstri, qazirgi memlekettik hatshy Muhtar Qul-Muhammed búgingi Mádenıet jáne aqparat mınınstri Darhan Myńbaımen keshe alqa májilisin ótkizdi. Bes saýsaqtaı biletin salasynyń alqa májilisine ózi kelýdi uıǵarǵan Muhtar Abraruly biraz máseleniń basyn ashyp, Memlekettik hatshy retinde mádenıet salasynyń bazynasyn tyńdap qaıtty», - dep jazady «Alash aınasy» gazeti. Basylymnyń atap ótýinshe, «Mádenı mura» ulttyq strategııalyq jobasynyń kezekti kezeńin iske asyrý aıaqtalypty. Soǵan sáıkes 73 tarıhı jáne mádenıet eskertkishi tolyq qalpyna keltirilgen. Ǵylymdy myńdaǵan artefaktilermen baıytyp, ulttyq tarıh kórinis beretin 30-dan astam ǵylymı-qoldanbaly jáne 40 arheologııalyq zertteý jurgizilgen. Maqala «Mádenıettiń alqasyna Memlekettik hatshy keldi» degen taqyryppen berilgen.
Osy basylymda «Básekelestikti qorǵaý agenttiginde qazaq tiliniń báseke qabileti shektelgeni qalaı?» degen taqyryppen maqala jaryq kórdi. «Baıaǵyda bir atamyz kók jáshikten Lenın babamyzdyń dýblıaj kúshimen qazaqsha sóılep turǵanyn kórip: «Pa, shirkin netken dara! Dananyń aty - dana, qarashy, qazaqsha da qalaı saıraıdy, á!» dep, qatty tamsanǵan eken. Sol sııaqty qazirgi tańda qazaq tilin qurmettemeıtin, biraq qazaq ultynan shyqqan dókeı bastyqtardy gazet-jýrnaldarda qazaqsha kósiltip, jaqsy qyrynan kórsetip júrgen qazaq jýrnalısteri ekenin bilip júrsin dep, biz de osy joly M.Esenbaev myrzanyń baıandamasyn qazaqsha «dýblıajdamadyq». Mundaı ádiletsizdigimiz úshin oqyrmannan keshirim suraımyz», - dep jazady basylym.
***
«Memleket basshysy Nursultan Nazarbaev Qazaqstan Respýblıkasynyń Premer-Mınıstri Kárim Másimovti qabyldady», - dep jazady «Kazahstanskaıa pravda» gazeti. Prezıdent bıliktiń barlyq qurylymy Joldaýdy iske asyrý jóninde alda turǵan jumysqa belsene áreket etýleri tıis ekenin atap kórsetti. «Kópke sozbastan, Úkimet óz josparyn anyqtap, áreket ete bastaýy qajet. Barlyq is-sharalardy qarjylandyrý kózderin tabý kerek. Ákimder elimiz aldynda turǵan jańa mindetterdi halyqqa túsindirýge tıis. Jumystyń qorytyndysy boıynsha Úkimettiń keńeıtilgen otyrysyn ótkizý qajet», - dedi Nursultan Nazarbaev. K.Másimov, óz kezeginde, Prezıdentti Úkimettiń Memleket basshysynyń Qazaqstan halqyna Joldaýynda bergen tapsyrmalardy oryndaý jónindegi jumysy týraly habardar etti.